ৰাজীৱ ভৱনত কংগ্ৰেছৰ কাৰ্যনিৰ্বাহক সভা অনুষ্ঠিত হোৱাৰ পূৰ্বে শণিবাৰে কিছু অথন্তৰ ঘটে। মূল প্ৰৱেশ দ্বাৰেৰে সোমাই অহা সময়তে প্ৰদেশ কংগ্ৰেছৰ সাধাৰণ সম্পাদক ৰমেশ জৈনক অশোভনীয় আচৰণ কৰাৰ অভিযোগ উত্থাপন হৈছে।
জৈনে মূল প্ৰবেশদ্বাৰৰে সোমাই অহা মুহূৰ্ততে আন এজন কংগ্ৰেছ কৰ্মীয়ে তেওঁক অশালীন আচৰণ কৰা বুলি অভিযোগ তোলে জ্যেষ্ঠ কংগ্ৰেছ নেতা জৈনে।
“আমি গান্ধীবাদী আদৰ্শৰে কংগ্ৰেছ কৰা মানুহ, প্ৰয়োজন হ’লে অনশন কৰিম। হাত ভৰি ভাঙি দিম বুলি কৈছে। মোক কিয় ভৰি হাত ভাঙি দিম বুলি ক’ব?”-জৈনে এনেদৰে কয়।
ইয়াৰ মাজতে দুগৰাকী কংগ্ৰেছ কৰ্মীয়ে জৈনক বুজোৱাৰ চেষ্টা কৰে যদিও তেজপুৰৰ কংগ্ৰেছী যুৱ নেতা পাৰ্থ প্ৰতিম বৰাই জৈনক উদ্দেশ্যি কয়, “ৰমেশ দা কোনে কৈছে আপোনাক তেনেকে? যিজনে কৈছে তাৰে হাত ভৰি ভাঙি দিব লাগে।”
অৱশ্যে, কোন কংগ্ৰেছ কৰ্মীয়ে এই আচৰণ কৰিলে সেয়া বৰ্তমালৈকে জানিব পৰা হোৱা নাই।
উল্লেখযোগ্য যে, দুপৰীয়া ১ বজাৰ পৰা অনুষ্ঠিত হৈছে প্ৰদেশ কংগ্ৰেছৰ কাৰ্যনিৰ্বাহক সভা। কাৰ্যনিৰ্বাহকলৈ প্ৰাক্তন মুখ্য মন্ত্ৰী ভূমিধৰ বৰ্মন, শৰৎ বৰকটকী, বলীন কুলী, প্ৰদ্যুত বৰদলৈ, এম জি ভি কে ভানু, আব্দুল খালেক, আবু তাহেৰ বেপাৰী, ভূপেন বৰাকে ধৰি অন্য জ্যেষ্ঠ নেতৃত্ব আহি উপস্থিত হৈছে।
উক্ত বৈঠকত বিগত লোকসভা নিৰ্বাচনত দলীয় বিপৰ্যয় তথা আগন্তুক ৪ টা বিধানসভা সমষ্টিৰ উপ নিৰ্বাচন সম্পৰ্কে আলোচনা হ’ব বুলি জানিব পৰা গৈছে।
ইপিনে, শনিবাৰে খ্ৰীষ্টানবস্তিৰ হোটেল gateway grand ত কংগ্ৰেছ বিধায়িনী দলৰ এখন বৈঠক অনুষ্ঠিত হয়। উক্ত বৈঠকত প্ৰদেশ কংগ্ৰেছৰ সভাপতি ৰিপুন বৰা, প্ৰাক্তন মুখ্য মন্ত্ৰী তৰুণ গগৈ, বিৰোধী দলপতি দেৱব্ৰত শইকীয়া আৰু উপ দলপতি ৰকিবুল হুছেইন উপস্থিত থাকে।
