কেইদিনমানৰ পূৰ্বে এ আই ইউ ডি এফ দল ত্যাগ কৰি কংগ্ৰেছ দলত যোগদান কৰা বৰপেটা সমষ্টিৰ হাজীপাৰা গাঁও পঞ্চায়তৰ কংগ্ৰেছ দলৰ সভাপতি পদৰ প্ৰাৰ্থিত্ব প্ৰত্যাশী ৰিয়াজ উদ্দিন আহমেদে এজন যুৱকক দলবদ্ধ আক্ৰমণ কৰাত সমগ্ৰ অঞ্চলব্যাপী তীব্ৰ প্ৰতিক্ৰিয়াৰ সৃষ্টি হৈছে।
প্ৰাপ্ত তথ্য মতে বহু বিতৰ্কিত প্ৰাক্তন পঞ্চায়ত সভাপতি তথা কংগ্ৰেছ দলৰ সভাপতি পদৰ প্ৰাৰ্থিত্ব প্ৰত্যাশী গৰাকীয়ে দেওবাৰে নিশাৰ ভাগত জাহিদ হাচান (মামুণ), বকুল আহমেদ, মইন উদ্দিন, ভাগিন হাৰুনাল ৰচিদক লগত লৈ একে গাঁৱৰে ৰেকিবুল ইছলামৰ ঘৰৰ দৰ্জা ভাঙি অনাধিকাৰ প্ৰবেশ কৰি যুৱকজনক দলবদ্ধভাৱে আক্ৰমণ কৰাৰ লগতে চোকা অস্ত্ৰৰে আঘাত কৰে।
আনহাতে আক্ৰমণৰ সন্মুখীন হোৱা ৰেকিবুল ইছলামে এই ঘটনা সন্দৰ্ভত আক্ৰমণকাৰী সকলৰ বিৰুদ্ধে হাউলী থানাত গোচৰ ৰুজু কৰে।
ৰেকিবুলৰ গোচৰ অনুসৰি আৰক্ষীয়ে ভাৰতীয় দণ্ড বিধিৰ ১৪৭/১৪৮/৪৫৭/৩২৫/৯০৭/৪২৭/৩৯৫ ধাৰাত ৫২৬/১৮ নম্বৰত এটি গোচৰ ৰুজু কৰি জাহিদ হাচান আৰু বকুল আহমেদেক আটক কৰে।
ইফালে কংগ্ৰেছ দলৰ সভাপতি পদৰ প্ৰাৰ্থিত্ব প্ৰত্যাশী ৰিয়াজ উদ্দিন আহমেদসহ আন দুজন বাতৰি লিখা পৰলৈকে পলাতক হৈ আছে বুলি আৰক্ষী সূত্ৰৰ পৰা জানিব পৰা গৈছে।