ধুবুৰী জিলাৰ সম্পূৰ্ণ অংশ আৰু গোৱালপাৰা জিলাৰ একাংশ সামৰি গঠন হৈছে ৪ নং ধুবুৰী লোকসভা সমষ্টি।এই সমষ্টিটো অসংৰক্ষিত।
নিৰ্বাচন আয়োগে দিয়া তথ্য অনুসৰি সমষ্টিটোত এইবাৰ ভোটাৰৰ সংখ্যা তলত দিয়া ধৰণৰ
- মুঠ ভোটাৰৰ সংখ্যা ১৮,৪৪,০৪০ গৰাকী
- পুৰুষ ভোটাৰ : ৯৪২৮৪৭জন
- মহিলা ভোটাৰ : ৯০১১৬৬গৰাকী
- তৃতীয় লিংগৰ ভোটাৰ: ২৭গৰাকী
মুঠ ভোটকেন্দ্ৰ আছে ২৪৫০টা
১৯৫১ চনত সমষ্টিটোৰ প্ৰথমটো সাধাৰণ নিৰ্বাচনত প্ৰজা ছ’চিয়েলিষ্ট পাৰ্টীৰ আমজাদ আলী সমষ্টিটোৰ প্ৰথমজন সাংসদ হিচাপে নিৰ্বাচিত হৈছিল।
বৰ্তমান এ আই য়ু ডি এফৰ দখলত থকা সমষ্টিটোৰ সাংসদ হৈছে বদৰুদ্দিন আজমল। দলটোৰ মুৰব্বী তথা সাংসদ আজমলে এইবাৰৰ লোকসভা নিৰ্বাচনতো ধুবুৰী সমষ্টিৰ পৰা প্ৰতিদ্বন্দ্বিতা আগবঢ়াইছে।
লোকসভা সমষ্টিটোত বিধানসভাৰ ১০টা সমষ্টি অন্তৰ্গত। বিধানসভা সমষ্টি কেইটা তলত উল্লেখ কৰা হ’ল
১) ২১ নং মানকাচৰ (কংগ্ৰেছৰ দখলত, বিধায়ক ড০ মতিউৰ ৰহমান মণ্ডল)
২) ২২ নং দক্ষিণ শালমাৰা (কংগ্ৰেছৰ দখলত, বিধায়ক ৱাজেদ আলী চৌধুৰী)
৩) ২৩ নং ধুবুৰী (এ আই য়ু ডি এফৰ দখলত, বিধায়ক নজৰুল হক)
৪) ২৪ নং গৌৰীপুৰ (এ আই য়ু ডি এফৰ দখলত, বিধায়ক নিজানুৰ ৰহমান)
৫) ২৫ নং গোলোকগঞ্জ (বিজেপিৰ দখলত, বিধায়ক অশ্বিনী ৰয় সৰকাৰ)
৬) ২৬ নং পশ্চিম বিলাসীপাৰা (এ আই য়ু ডি এফৰ দখলত, বিধায়ক হাফিজ বছিৰ আহমেদ)
৭) ২৭ নং বিলাসীপাৰা (পূব) (বিজেপিৰ দখলত, বিধায়ক অশোক কুমাৰ সিংঘী)
৮) ৩৭ নং গোৱালপাৰা (পূব) (কংগ্ৰেছৰ দখলত, বিধায়ক আবুল কালাম ৰছিদ আলম)
৯) ৩৮ নং গোৱালপাৰা (পশ্চিম) (কংগ্ৰেছৰ দখলত, বিধায়ক আব্দুৰ ৰছিদ মণ্ডল)
১০) ৩৯ নং জলেশ্বৰ বিধানসভা সমষ্টি (এ আই য়ু ডি এফৰ দখলত, বিধায়ক চাহাব উদ্দিন আহমেদ)
উল্লেখযোগ্য যে সংখ্যালঘু অধ্যুষিত ধুবুৰী লোকসভা সমষ্টিটোত ১৯৫১ আৰু ১৯৫৭ চনত সংসদলৈ নিৰ্বাচিত হৈছিল প্ৰজা ছ’চিয়েলিষ্ট পাৰ্টিৰ আমজাদ আলী। ইয়াৰ পাছত ১৯৬২ চনত প্ৰথমবাৰৰ বাবে সমষ্টিটোৰ পৰা কংগ্ৰেছ দলৰ গিয়াছুদ্দিন আহমেদ বিজয়ী হয়। ১৯৬৭ চনত পুনৰবাৰ প্ৰজা ছ’চিয়েলিষ্ট পাৰ্টীৰ জাহানুদ্দিন আহমেদে সমষ্টিটো দখল কৰে।
আনহাতে ১৯৭১ চনৰ পৰা ২০০৪ চনলৈ একেৰাহে ৮ বাৰৰ বাবে সমষ্টিটো নিজৰ দখলত ৰাখে কংগ্ৰেছ দলে। কিন্তু পৰৱৰ্তী ২০০৯ আৰু ২০১৪ চনৰ নিৰ্বাচনত সমষ্টিটোৰ পৰা নিৰ্বাচিত হয় ২০০৫ চনত গঠন হোৱা এ আই য়ু ডি এফ দলৰ মুৰব্বী বদৰুদ্দিন আজমল।
২০১৪ চনৰ নিৰ্বাচনত বদৰুদ্দিন আজমলে ৫৯২৫৬৯টা ভোট লাভ কৰাৰ বিপৰীতে দ্বিতীয় স্থানত থকা কংগ্ৰেছৰ ৱাজেদ আলী চৌধুৰীয়ে পাই ৩৬২৮৩৯টা ভোট। তৃতীয় স্থানত থকা বিজেপি প্ৰাৰ্থী ড০ দেৱমই শন্যালে ২৯৮৯৮৫টা, নিৰ্দলীয় প্ৰাৰ্থী মোহৰ উদ্দিন মণ্ডলে ৪০২০৮টাৰ বিপৰীতে ন’টাত পৰে ৫৮১১টা ভোট।
নিৰ্বাচনৰ বাবে সমষ্টিটোত এইবাৰ মুঠ ১৭জন প্ৰাৰ্থীয়ে মনোনয়ন দাখিল কৰিছে। তেওঁলোক হ’ল ক্ৰমে এ আই য়ু ডি এফৰ বদৰুদ্দিন আজমল, কংগ্ৰেছৰ আবু তাহেৰ বেপাৰী, অসম গণ পৰিষদ দলৰ জাৱেদ ইছলাম, তৃণমূল কংগ্ৰেছৰ নুৰুল ইছলাম চৌধুৰী, ছ’চিয়েলিষ্ট য়ুনিটি চেণ্টাৰ অব ইণ্ডিয়াৰ সুৰত জামান মণ্ডল, ভোটাৰ্চ পাৰ্টি ইণ্টাৰনেশ্যনেলৰ চাহজাহান শ্বেখ, ৰিপাব্লিকান পাৰ্টি অব ইণ্ডিয়া(এ)ৰ মেহবুবাৰ ৰহমান, হিন্দুস্থান নিৰ্মাণ দলৰ অলকেশ ৰয়, পূৰ্বাঞ্চল জনতা পাৰ্টি(চেকুলাৰ)ৰ জহিৰুল ইছলাম খান, ভাৰতীয় নেশ্যনেল জনতা দলৰ নৃপেন দাস, আৰু নিৰ্দলীয় ৰুকুনৰ জামান, উত্তম কুমাৰ ৰায়, শুকুৰ আলী, হুছেইন সৰকাৰ, আশ্ৰফ আলী, চেলিনা চুলতানা আৰু অনামিকা সৰকাৰ।
২০১৯ চনৰ দেশৰ সপ্তদশ লোকসভা নিৰ্বাচনৰ তৃতীয় পৰ্যায়ত সমষ্টিটোত ভোটগ্ৰহণ সম্পন্ন হ’ব। তৃতীয় পৰ্যায়ৰ ভোটগ্ৰহণ অহা ২৩ এপ্ৰিলত।
