দোষী সাব্যস্ত হোৱাৰ পিছতে দিল্লীৰ আদালতৰ কক্ষত অভিযুক্ত আৰু তেওঁৰ অধিবক্তাই এগৰাকী মহিলা ন্যায়াধীশক ভাবুকি দিয়ে। অভিযুক্তই মহিলা ন্যায়াধীশক উদ্দেশ্যি কয়, “আপুনি কোন? বাহিৰত দেখা কৰক, চাওঁচোন আপুনি কেনেকৈ জীৱিত অৱস্থাত ঘৰলৈ উভতি যায়।” এই কথা শুনি ন্যায়াধীশ শিৱাংগী মংগলাকে ধৰি আদালতত উপস্থিত থকা সকলোৱে স্তম্ভিত হৈ পৰে।
ন্যায়াধীশ শিৱাংগী মংগলাই যোৱা ২ এপ্ৰিলত চেক বাউন্স গোচৰত অভিযুক্তক দোষী সাব্যস্ত কৰিছিল। তাতেই অভিযুক্ত খঙত তিঙিৰি তুলা হৈ পৰে। যিকোনো উপায়েৰে আদালতৰ ৰায় তেওঁৰ পক্ষত নিবলৈ অধিবক্তাগৰাকীৰ ওপৰত হেঁচা অব্যাহত ৰাখিছিল অভিযুক্তই। সেই সময়তে দোষী সাব্যস্ত হোৱা ব্যক্তিজনে আদালতৰ মহিলা ন্যায়াধীশ শিৱাংগী মংগলাৰ উদ্দেশ্যি এই মন্তব্য কৰে।
আদালতৰ নিৰ্দেশনাতো অভিযুক্তৰ সেই কু-মন্তব্যৰ কথা উল্লেখ কৰা হৈছে। নিৰ্দেশনাত কোৱা হৈছে যে ৰায়দান তেওঁৰ পক্ষত নথকাৰ পিছত অভিযুক্তই ন্যায়াধীশৰ ওপৰত নিজৰ ক্ষোভ প্ৰকাশ কৰিছিল। ন্যায়াধীশক হাৰাশাস্তি কৰিবলৈ ধৰে। ন্যায়াধীশগৰাকীৰ মাতৃৰ বিৰুদ্ধেও তেওঁ হিন্দীত কিছু মন্তব্য কৰে।
সেই সময়ত অভিযুক্তৰ হাতত এটা বস্তু আছিল, যিটো তেওঁ ন্যায়াধীশৰ পিনে মাৰি পঠিয়াবলৈ চেষ্টা কৰে। অৱশেষত অভিযুক্তই যিকোনো উপায়েৰে নিজৰ পক্ষত ৰায়টো আনিবলৈ নিজৰ অধিবক্তাৰ কাষ চাপে। ইয়াৰ পিছত দুয়োজনে ন্যায়াধীশক অপমান কৰিবলৈ ধৰে।
নিৰ্দেশটোত উল্লেখ আছে যে অভিযুক্ত আৰু তেওঁৰ অধিবক্তাই ন্যায়াধীশক মানসিক আৰু শাৰীৰিকভাৱে হাৰাশাস্তি কৰিবলৈ চেষ্টা কৰিছিল। লগতে অভিযুক্তক দোষমুক্ত নকৰিলে ন্যায়াধীশগৰাকীক পদত্যাগ কৰিবলৈ বাধ্য কৰা হ’ব বুলিও তেওঁলোকে দাবী কৰে৷ অৱশ্যে এই পৰিস্থিতিতো ন্যায়াধীশগৰাকী নিজৰ স্থিতিত অটল থাকে।
এই বিষয়টো ৰাষ্ট্ৰীয় মহিলা আয়োগৰ দৃষ্টিগোচৰ কৰাৰ সিদ্ধান্ত লৈছে ন্যায়াধীশগৰাকীয়ে। ন্যায়াধীশ মংগলাই এই আচৰণৰ বাবে অভিযুক্তৰ অধিবক্তা অতুল কুমাৰলৈও কাৰণ দৰ্শোৱাৰ জাননী প্ৰেৰণ কৰাৰ সিদ্ধান্ত লৈছে।
