বিজ্ঞানীয়ে দাবী কৰিছে যে কৰ’না ভাইৰাছ আক্ৰান্ত ৰোগীয়ে ১১দিনৰ পাছত সংক্ৰমণ বিয়পাব নোৱাৰে।
nypost.comৰ প্ৰতিবেদন অনুসৰি, ছিংগাপুৰ নেশ্যনেল চেন্টাৰ ফৰ ইনফেকশ্যন ডিজিজেজ (NCID) এণ্ড একাডেমী অফ মেডিচিনে চলোৱা এক অধ্যয়নত এই কথা প্ৰকাশ পাইছে।
এতিয়ালৈকে জানিব পৰা গৈছিল যে কৰ’না আক্ৰান্ত ৰোগীয়ে পজিটিভ থকালৈকে সংক্ৰমণ ঘটাব পাৰে।
তদুপৰি,গৱেষকসকলে দাবী কৰিছিল যে কৰ’নাৰ লক্ষণ প্ৰকাশ পোৱাৰ দুদিন পূৰ্বৰে পৰাই কৰ’না আক্ৰান্ত ৰোগীয়ে সংক্ৰমণ ঘটাব পাৰে।
কিন্তু এই বিজ্ঞানীসকলে তেওঁলোকৰ অধ্যয়নত লাভ কৰিছে যে কৰ’না আক্ৰান্ত ৰোগীৰ লক্ষণ দেখুওৱাৰ ৭দিনৰ পৰা ১০ দিনলৈকে সংক্ৰমণ ঘটাব পৰা ক্ষমতা থাকে।
ছিংগাপুৰ নেশ্যনেল চেন্টাৰ ফৰ ইনফেকশ্যন ডিজিজেজৰ গৱেষকসকলে প্ৰায় ৭৩জন কৰ’না আক্ৰান্ত ৰোগীৰ ওপৰত অধ্যয়ন চলাই এই নতুন তথ্য লাভ কৰিছে।
বিজ্ঞানীসকলে সদৰী কৰিছে যে ১১ দিনৰ পাছত কৰ’না ভাইৰাছক পৃথক বা বিকশিত কৰিব পৰা নাযায়।
গৱেষকসকলে প্ৰকাশ কৰা মতে, লক্ষণ দেখুওৱাৰ এসপ্তাহ পাছত কৰ’না আক্ৰান্ত ৰোগীৰ সক্ৰিয় সংক্ৰমণ ক্ষমতা হ্ৰাস পাবলৈ ধৰে।
নতুন তথ্যৰ আধাৰত হাস্পাতলসমূহে ৰোগীক কেতিয়া ডিছাৰ্জ কৰিব পাৰি তাৰ সিদ্ধান্ত ল’ব পাৰে।
আমেৰিকাকে ধৰি বহু দেশত কৰ’না ৰোগীৰ দুবাৰকৈ নিগেটিভ অহাৰ পাছতহে চিকিৎসকে ৰোগীজন সুস্থ হোৱা বুলি ধৰি লয়।
ছিংগাপুৰৰ এই অধ্যয়নৰ তথ্য চিকিৎসকসকলৰ বাবে গুৰুত্বপূৰ্ণ বুলি বিবেচিত হৈছে।
ছিংগাপুৰৰ NCIDৰ কাৰ্যবাহী সঞ্চালক লিঅ’ জি চিনে জানিবলৈ দিয়ে যে নমুনাৰ আকাৰ (সংখ্যাৰ) সৰু হোৱা সত্তেও নতুন তথ্যই গৱেষকসকলক আশ্বস্ত কৰিছে আৰু ডাঙৰ আকাৰৰ নমুনাৰ ক্ষেত্ৰতো একেই ফলাফল পোৱা যাব বুলি দৃঢ়তা প্ৰকাশ কৰিছে।
লিঅ’ জি চিনে লগতে কয় যে বৈজ্ঞানিক দৃষ্টিৰে মই যথেষ্ট আশ্বস্ত হৈছো। কৰ’না ৰোগী ১১ দিন পাছত সংক্ৰামক নোহোৱাৰপৰ্যাপ্ত প্ৰমান আছে।
