“দুৰ্নীতিগ্ৰস্ত লোকে দেশ ধ্বংস কৰিছে, তেওঁলোকৰ বিৰুদ্ধে কোনো ব্যৱস্থা লোৱা নাই’’ : উচ্চতম ন্যায়ালয়

দুৰ্নীতিয়ে কেনেকৈ দেশখন ধ্বংস কৰি আছে তাকলৈ উদ্বিগ্নতা প্ৰকাশ কৰিছে দেশৰ উচ্চতম ন্যায়ালয়ে। বুধবাৰে ন্যায়াধীশ কে এম জোচেফ আৰু হৃষিকেশ ৰায়ৰ এখন বিভাগীয় বিচাৰপীঠে ভীমা কোৰেগাঁও গোচৰৰ অভিযুক্ত গৌতম নৱলাখাৰ আবেদনৰ শুনানি গ্ৰহণ কৰি কয় যে দুৰ্নীতিগ্ৰস্ত লোকে দেশখন ধ্বংস কৰি আনিছে।

উল্লেখ্য যে অতিৰিক্ত ছলিচিটৰ জেনেৰেল এছ ভি ৰাজুৱে ভীমা কাৰেগাঁও গোচৰৰ অভিযুক্ত গৌতম নৱলাখাৰক কাৰাগাৰৰ পৰিৱৰ্তে গৃহবন্দী কৰি ৰখাৰ তীব্ৰ বিৰোধিতা কৰাৰ পিছতে বিচাৰপীঠে এই মন্তব্য কৰে।
“এই দেশ কোনে ধ্বংস কৰি আছে? আপুনি বিচাৰিছে নেকি আমি আপোনাক কওঁ? দুৰ্নীতিগ্ৰস্ত লোকে কৰিছে। আপুনি যিকোনো এটা কাৰ্যালয় এটালৈ যাওক, তাত কি হয় চাওক।” অতিৰিক্ত ছলিচিটৰ জেনেৰেল এছ ভি ৰাজুক উদ্দেশ্যি বিচাৰপীঠে এইদৰে কয়।

গৌতম নৱলাখৰৰ গোচৰটো পৰ্যবেক্ষণ কৰি উচ্চতম ন্যায়ালৰ বিচাৰপীঠখনে লগতে কয় যে অভিযুক্ত গৌতম নৱলাখৰ এজন ৭০ বছৰীয়া ব্যক্তি। তেওঁ আৰু কিমান দিন জীয়াই থাকিব সেয়া অনিশ্চিত। তেওঁ এক অনিশ্চিত ভৱিষ্যতৰ দিশে আগবাঢ়িছে। আমি তেওঁক জামিন প্ৰদান কৰা নাই। তেওঁৰ গোচৰটো আমি পৰ্যবেক্ষণ কৰিছো আৰু তেওঁলোকে দেশখন ধ্বংস কৰিব বিচৰাৰ দৰে কোনো কাম কৰা নাই। আমি নাভাবো যে তেওঁলোকে দেশখন ধ্বংস কৰিব।

ইয়াৰ পাছতে দুৰ্নীতিগ্ৰস্ত লোকে দেশখন ধ্বংস কৰা বুলি বিচাৰপীঠে মন্তব্য কৰি তেনে দুৰ্নীতিগ্ৰস্ত লোকৰ বিৰুদ্ধে কোনে ব্যৱস্থা গ্ৰহণ কৰে বুলিও অতিৰিক্ত ছলিচিটৰ জেনেৰেলগৰাকীক প্ৰশ্ন কৰে।