মৰিগাঁও জিলা শিক্ষা বিভাগৰ সকলো স্তৰতে কমিচনৰাজ গঢ় লোৱাৰ অভিযোগ
দুৰ্নীতিৰ ভূ স্বৰ্গ তথা সোণৰ কণী পৰা হাঁহলৈ পৰ্যৱসিত হৈছে মৰিগাঁও জিলা শিক্ষা বিভাগ। এই গুৰুতৰ অভিযোগ মৰিগঞা ৰাইজৰ। মৰিগাঁও জিলা শিক্ষা বিভাগৰ অন্তৰ্গত জিলাখনৰ সৰ্ববৃহৎ লাহৰীঘাট শিক্ষা খণ্ডত সংঘটিত হৈছে এই অবাঞ্ছিত ঘটনা।
কেন্দ্ৰটোত একাংশ চি আৰ চি চিয়ে বক্ৰ পথেৰে লৈছে ছাত্ৰ ছাত্ৰীৰ ইউনিফৰ্মৰ ঠিকাৰ যোগান।ঘটনা সংক্ৰান্তত প্ৰাপ্ত তথ্য তথা ৰাইজৰ অভিযোগ মতে,গোপন ধনৰ মিতিৰালিৰ অংকত এই চি আৰ চি চি সকলে নিজা নিজা এলেকাৰ স্কুল সমূহক একাংশ নিৰ্দিষ্ট প্ৰতিষ্ঠানক ছাত্ৰ ছাত্ৰীৰ ইউনিফৰ্ম যোগানৰ দায়িত্ব দিবলৈ বাধ্য কৰিছে।
আনকি একাংশ চি আৰ চি চিয়ে নিৰ্দিষ্ট কৰি দিয়া প্ৰতিষ্ঠান সমূহক ছাত্ৰ ছাত্ৰীৰ ইউনিফৰ্মৰ ঠিকা নিদিলে বিভিন্ন অজুহাত দেখুৱাই শিক্ষক সকলক হাৰাশাস্তি কৰাৰো অভিযোগ উত্থাপিত হৈছে। ছাত্ৰ ছাত্ৰীৰ ইউনিফৰ্ম যোগানকাৰী প্ৰতিষ্ঠান সমূহে চি আৰ চি চিক কমিচন দিয়াৰ উপৰিও একাংশ স্কুলৰ পৰিচালনা সমিতিকো দিব লাগে কমিচন। এই কমিচন দিয়াৰ পাছত ছাত্ৰ ছাত্ৰীৰ দুযোৰ ইউনিফৰ্ম ৩০০ – ৩৫০ টকাৰ ভিতৰত ঠিকা লাভ কৰা প্ৰতিষ্ঠান সমূহে প্ৰস্তুত কৰে।
ফলত এযোৰ ইউনিফৰ্মৰ প্ৰকৃত মূল্য হয়গৈ ১৫০ টকাৰ পৰা ১৭৫ টকাৰ ভিতৰত। যাৰ বাবে অতি নিম্ন মানৰ কাপোৰ ব্যৱহাৰ কৰি ইউনিফৰ্ম সমূহ চিলাবলৈ বাধ্য কৰোৱা হয় যোগানকাৰী প্ৰতিষ্ঠান সমূহক। কোনোখন বিদ্যালয়ত আকৌ কোনো জোখ – মাখ নোলোৱাকৈয়ে দুই তিনিটা নিৰ্দিষ্ট জোখৰ কাপোৰ যোগান ধৰাৰ ফলত ছাত্ৰ ছাত্ৰী সকলে পুনৰ দৰ্জিৰ ওচৰ চাপিব লগা হৈছে। কিন্তু চি আৰ চি চি সকলে ইউনিফৰ্মৰ নামত সংগ্ৰহ কৰা এই বৃহৎ কমিচনৰ অংশ কাৰ কাৰ হাতলৈ গৈছে সেয়াহে ৰহস্যজনক লগতে লক্ষণীয় হৈ পৰিছে।
শিক্ষা মন্ত্ৰী হিমন্ত বিশ্ব শৰ্মাই দুৰ্নীতিৰ বিৰুদ্ধে শূণ্য সহনশীলৰ কথা সভাই সমিতিয়ে কৈ দম্ভালি মাৰি আহিছে যদিও এই ক্ষেত্ৰত নিজৰ বিভাগটোৰ দুৰৱস্থাই লজ্জাজনক ভাৱে পুতৌলগা অৱস্থা হৈ পৰিছে। লাহৰীঘাট শিক্ষা খণ্ডটো ইয়াৰ এটা উদাহৰণহে মাত্ৰ। বানে ধোৱা জিলা খনৰ আন আন শিক্ষা খণ্ড সমূহতো বিভিন্ন ক্ষেত্ৰত চলিছে ব্যাপক কমিচনৰাজৰ বজাৰ।
মুঠতে মৰিগাঁও জিলা শিক্ষা বিভাগটো এতিয়া কমিচনৰাজ আৰু চান্দা সংস্কৃতিৰ মিনা বজাৰত পৰিণত হৈছে।এই ক্ষেত্ৰত বিভাগীয় মন্ত্ৰী ড° হিমন্ত বিশ্ব শৰ্মাই কি ব্যৱস্থা গ্ৰহণ কৰে সেয়াহে লক্ষণীয় বিষয় হৈ পৰিছে।