অসমত ক’ভিড-১৯ পৰীক্ষাগাৰ ছটালৈ বৃদ্ধি
অসমত ক’ভিড-১৯ পৰীক্ষাগাৰ ছটালৈ বৃদ্ধি পাইছে।
ভাৰতীয় চিকিৎসা গৱেষণা পৰিষদে তেজপুৰ চিকিৎসা মহাবিদ্যালয় আৰু চিকিৎসালয়ৰ পৰীক্ষাগাৰলৈ এই সন্দৰ্ভত শুকুৰবাৰে স্বীকৃতি আগবঢ়াইছে।
স্বাস্থ্য মন্ত্ৰী হিমন্ত বিশ্ব শৰ্মাই এই তথ্য সদৰী কৰিছে।
তেওঁ সদৰী কৰা মতে তেজপুৰৰ পৰীক্ষাগাৰটোত স্বীকৃতি লাভৰ প্ৰথম দিনাই সফলতাৰে ক’ভিড-১৯ পৰীক্ষা সম্পন্নও কৰা হৈছে।
ইয়াৰ পূৰ্বে গুৱাহাটী, ডিব্ৰুগড়, শিলচৰ, যোৰহাট আৰু বৰপেটাৰ চিকিৎসা মহাবিদ্যালয়কেইখনৰ পৰীক্ষাগাৰক ক’ভিড-১৯ পৰীক্ষাৰ অনুমতি দিয়া হৈছিল।
তাৰ উপৰি ডিব্ৰুগড়ৰ লাহোৱালত থকা ভাৰতীয় চিকিৎসা গৱেষণা পৰিষদৰ আঞ্চলিক পৰীক্ষাগাৰটোতো ক’ভিড-১৯ৰ পৰীক্ষা কৰি থকা হৈছে।
Glad to share that @ICMRDELHI has approved facility at Tezpur Medical College as an accredited laboratory for testing of #COVID19. Now we’ve 6 testing labs. On first day itself, we’ve conducted successful testing.
This further bolsters our preparedness and testing capabilities.
— Himanta Biswa Sarma (@himantabiswa) April 17, 2020
ইফালে ক’ভিড-১৯ত আক্ৰান্ত অসমৰ চাৰিজন ব্যক্তিক শুকুৰবাৰে চিকিৎসালয়ৰ পৰা মুকলি কৰি দিয়া হৈছে।
গোলাঘাট জিলাৰ চাৰিগৰাকী ব্যক্তিক ধৰি অসমত এতিয়ালৈকে নগৰাকী ব্যক্তিয়ে ক’ভিড-১৯ৰ পৰা আৰোগ্য লাভ কৰিলে।
ইয়াৰ পূৰ্বে যোৱা দুদিনত সোণাপুৰ অসামৰিক চিকিৎসালয়ৰ পৰা দুগৰাকী আৰু গোৱালপাৰা অসামৰিক চিকিৎসালয়ৰ পৰা তিনিজন সুস্থ ব্যক্তিক যাবলৈ দিয়া হৈছিল।
অসমত ক’ভিড-১৯ আক্ৰান্ত এজন ব্যক্তিৰ চিকিৎসাধীন অৱস্থাত মৃত্যু ঘটিছে।
অসমত মুঠ ৩৪ গৰাকী ক’ভিড-১৯ আক্ৰান্ত চিনাক্ত হৈছিল। বৰ্তমান ৰাজ্যত সক্ৰিয় ক’ভিড-১৯ ৰোগীৰ সংখ্যা ২৪ গৰাকী।