চীনত এতিয়া এবিধ বিশেষ আইক্ৰীমে প্ৰশাসনৰ টোপনি হৰণ কৰিছে।
যিসকল লোকে বজাৰৰ পৰা ক্ৰয় কৰি সেই আইচক্ৰীম খাইছে তেওঁলোকৰ ওপৰত এতিয়া চোকা দৃষ্টি ৰাখিছে প্ৰশাসনে।
আনকি সেই আইচক্ৰীম খোৱা লোকসকলক প্ৰশাসনৰ ওচৰত হাজিৰ হোৱাৰো নিৰ্দেশ দিয়া হৈছে।
দৰাচলতে ক’ৰ’ণা ভাইৰাছৰ অভিকেন্দ্ৰ হিচাবে পৰিগণিত হোৱা চীনত শেহতীয়াকৈ পুনৰ ক’ৰ’ণাৰ নতুনকৈ সংক্ৰমণ ঘটিবলৈ আৰম্ভ কৰিছে।
এনে সময়তে আকৌ দেশ খনৰ বজাৰত বিক্ৰী হৈ থকা তিয়ানজিয়ান ডাকাইৱাডা নামৰ কোম্পানীটোৱে প্ৰস্তুত কৰা আইচক্ৰীমত ক’ৰ’ণা ভাইৰাছৰ উপস্থিতি ধৰা পৰাৰ পিছতে অধিক চিন্তিত হৈ পৰিছে দেশ খনৰ চৰকাৰ।
শেহতীয়াকৈ কোম্পানীটোৱে প্ৰস্তুত কৰা আইচক্ৰীম সমূহৰ ভিত্ৰ তিনিটা আইচক্ৰীমত ক’ৰ’ণাৰ উপস্থিতি পোৱাৰ পিছতে চৰকাৰে দেশ খনৰ যিসকল লোকে এই আইচক্ৰীম খাইছে তেওঁলোকক সংশ্লিষ্ট অঞ্চলৰ প্ৰশাসনৰ ওচৰত হাজিৰ হৈ স্বাস্থ্য পৰীক্ষা কৰোৱাবলৈ নিৰ্দেশ দিছে।
চীনৰ চৰকাৰে শেহতীয়াকৈ মানুহৰ বাহিৰেও আন কি কি সামগ্ৰীৰ পৰা ক’ৰ’ণা ভাইৰাছ বিয়পিব পাৰে তাৰ এক সমীক্ষা চলাইছিল।
চৰকাৰে বজাৰৰ পৰা আইচক্ৰীমকে ধৰি আন বহু সামগ্ৰী সংগ্ৰহ কৰি সেইবোৰ পৰীক্ষা কৰি চাইছিল।
এনে কৰোতে তিনিটাকৈ আইচক্ৰীমত ক’ৰ’ণাৰ উপস্থিতি ধৰা পৰে। চীনৰ চৰকাৰৰ এগৰাকী মুখপাত্ৰই প্ৰকাশ কৰা মতে উক্ত আইচক্ৰীম প্ৰস্তুত কৰাৰ বাবে প্ৰয়োজনীয় কেঁচামাল নিউজিলেণ্ড আৰু ইউক্ৰেইনৰ পৰা অনা হয়।
কেঁচামালৰ পৰাই ক’ৰ’ণা ভাইৰাছ আইচক্ৰীমলৈ বিয়পি পৰাৰ সন্দেহ কৰা হৈছে। সম্প্ৰতি চীনৰ বজাৰত সেই আইচক্ৰীমৰ বিক্ৰী নিষিদ্ধ কৰা হৈছে।
