বিশ্বৰ ১১৫ খন দেশত এতিয়া কোভিডে কালান্তক ৰূপ ধাৰণ কৰিছে। ব্যতিক্ৰম ঘটা নাই ভাৰততো। ভাৰতত ইতিমধ্যে কোভিডৰ তৃতীয় ঢৌ আৰম্ভ হৈ গৈছে।
কেন্দ্ৰীয় স্বাস্থ্য সচিব ৰাজেশ ভূষণে সোমবাৰে ৰাজ্য আৰু কেন্দ্ৰীয় শাসিত অঞ্চলসমূহৰ চৰকাৰলৈ এখন পত্ৰ লিখি কোভিড পৰিস্থিতি সন্দৰ্ভত বিতং তথ্য প্ৰদান কৰিবলৈ আহ্বান জনায়।
পত্ৰ খনত তেওঁ দেশৰ সকলো ৰাজ্যকে যিকোনো প্ৰতিকূল পৰিস্থিতিৰ বাবে সাজু থাকিবলৈ কয়।
ভূষণে কয় যে শেহতীয়াকৈ দেশত অনিক্ৰনৰ সংক্ৰমণ উদ্বেগজনক ভাবে বাঢ়ি গৈছে। সেয়ে সকলোৱে সতৰ্কতা অৱলম্বন কৰা উচিৎ বুলি তেওঁ মন্তব্য কৰে।
কোভিড আক্ৰান্ত ৰোগীৰ ক্ষেত্ৰত চিকিৎসালয়ত ভৰ্তি হোৱাৰ হাৰ ৫-১০ শতাংশ হৈ আছে বুলি ভূষণে মন্তব্য কৰিছে। এয়া তুলনামূলক ভাবে কম যদিও ৰাজ্যসমূহে ভৱিষ্যতৰ যিকোনো পৰিস্থিতিৰ বাবে সাজু থকা উচিৎ বুলি তেওঁ পত্ৰ খনত উল্লেখ কৰে।
কোভিড ৰোগীৰ বাবে থকা সকলো চিকিৎসালয়ত অক্সিজেন, বিচনা, আইচিইউ বিচনা আদি যাতে পৰ্যাপ্ত ৰূপত থাকে সেই বিষয়ত তীক্ষ্ণ নজৰ ৰাখিবলৈ তেওঁ আহ্বান জনায়।
স্বাস্থ্য সচিবে ৰাজ্যসমূহক স্বাস্থ্যসেৱা কৰ্মীৰ কোনো অভাৱ নোহোৱাটো নিশ্চিত কৰিবলৈ আৰু দৈনিক ভিত্তিত পৰিস্থিতি নিৰীক্ষণ কৰি থাকিবলৈ আহ্বান জনায়।
উল্লেখ্য দেশত আজি অমিক্ৰন আক্ৰান্ত ৰোগীৰ সংখ্যা ৪,০০৩ গৰাকী হৈছে। এই ৰোগীসকলৰ ১,২১৬ গৰাকীয়েই হৈছে মহাৰাষ্ট্ৰৰ।
