ক’ৰ’না মহামাৰীয়ে সমগ্ৰ বিশ্বৰে স্বাস্থ্য খণ্ডৰ লগতে আন সকলো ক্ষেত্ৰতে ব্যাপক প্ৰভাৱ পেলাইছে।বন্ধ হৈ পৰিছে বহু উদ্যোগ প্ৰতিষ্ঠান।
দেশৰ শৈক্ষিক খণ্ডতো ক’ৰ’না ভাইৰাছে ভাবিব নোৱাৰা ধৰণে প্ৰভাৱ পেলাইছে।
ক’ৰ’ণাতংকৰ বাবে দেশৰ সকলো ৰাজ্যতে এতিয়া বন্ধ হৈ আছে সকলো বিদ্যালয়, মহাবিদ্যালয়। এনে এক বিষম পৰিস্থিতিৰ মাজতে অল ইণ্ডিয়া কাউন্সিল ফৰ টেকনিকেল এডুকেছনে প্ৰকাশ কৰিছে এক ভয়াৱহ তথ্য।
অল ইণ্ডিয়া কাউন্সিল ফৰ টেকনিকেল এডুকেছনে শেহতীয়াকৈ প্ৰকাশ কৰা অনুসৰি ক’ৰ’নাতংকৰ বাবেই দেশত বন্ধ হ’ব ১৭৯ খন কাৰিকৰী কলেজ।
এ আই চি টি ইৰ সূত্ৰই প্ৰকাশ কৰা মতে উক্ত কাৰিকৰী কলেজ কেইখনত ল’কডাউনৰ পিছৰে পৰা ছাত্ৰ-ছাত্ৰীয়ে নাম ভৰ্তি কৰা নাই।
তদুপৰি, কলেজ কেইখনত কাম কৰা শিক্ষক-শিক্ষয়িত্ৰীৰ দা-দৰমহা আদি দিয়াৰ ক্ষেত্ৰতো ভীষণ অসুবিধাই দেখা দিছে। ইয়াৰ ফলতে উক্ত কলেজ কেইখন বন্ধ কৰি দিয়াৰ সিদ্ধান্ত লৈছে সংশ্লিষ্ট কৰ্তৃপক্ষই।
এ আই চি টি ইৰ সূত্ৰটোৱে লগতে কয় যে আন ১৩৪ খন কাৰিকৰী কলেজে এতিয়ালৈকে ২০২০-২০২১ শিক্ষা বৰ্ষৰ বাবে পাঠ্যক্ৰমৰ অনুমোদন বিচাৰি আবেদন জনোৱা নাই। সেই দিশৰ পৰা এই কেইখন কাৰিকৰী কলেজো বন্ধ হোৱাৰ আশংকা আছে।
এতিয়ালৈকে ১৩০০ খন কাৰিকৰী কলেজে পাঠ্যক্ৰমৰ বাবে অনুমোদন বিচৰা বুলি এ আই চি টি ইৰ সূত্ৰই প্ৰকাশ কৰিছে
উল্লেখ যোগ্য যে, দেশত বৰ্তমান অভিযান্ত্ৰিককে ধৰি বিজনেছ আৰু অন্যান্য খণ্ডৰ ৯৬৯১ খন কাৰিকৰী কলেজ আছে। বন্ধ হ’বলগীয়া ১৭৯ খন প্ৰতিষ্ঠানৰ নাম তালিকা অৱশ্যে এ আই চি টি ইয়ে এতিয়া লৈকে ৰাজহুৱা কৰা নাই।
