যোৱা কিছুদিনৰ পৰা শিৱসাগৰ জিলাত গৰুচোৰৰ দল সক্ৰিয় হৈ পৰা পৰিলক্ষিত হৈছে। ইয়াৰ মাজতে আজি পুৱতি নিশা শিৱসাগৰ নগৰৰ সমীপৰ বেতবাৰীত পুনৰ এক গৰুচোৰৰ ঘটনা পোহৰলৈ আহে।
প্ৰাপ্ত তথ্য মতে বেতবাৰীৰ ঘিলাগুৰিত স্থানীয় যুৱকৰ দলে কৰায়ত্ত কৰিবলৈ লওঁতেই গৰু বিক্ৰী কৰি অহা এটা চোৰৰ দল ঘটনাস্থলীৰ পৰা পলাই সাৰে।
ঘটনাৰ বিৱৰণি অনুসৰি আজি পুৱা প্ৰায় ৩:৩০ বজাত ঘিলাগুৰি অঞ্চলত যান্ত্ৰিক বিজুতি ঘটা এ এছ ০৩ এইছ ০৩৬৫ নম্বৰৰ এখন ৰঙা ৰঙৰ ইণ্ডিকা ভিষ্টা গাড়ীক ৰাষ্ট্ৰীয় ঘাইপথত আন এখন গাড়ীয়ে টানি নিবলৈ চেষ্টা কৰি থকা দেখা পাই এটা স্থানীয় যুৱকৰ দল গাড়ীখনৰ ওচৰলৈ আহিছিল।
কিন্তু যুৱকৰ দলটোক দেখা পোৱা মাত্ৰকে গৰুচোৰৰ দলটোৱে ভিষ্টা গাড়ীখন তাতে এৰি আনখন গাড়ীত উঠি পলায়ন কৰে। পিছত যুৱকৰ দলটোৱে গাড়ীখনৰ ভিতৰত গৰুৰ গোবৰ প্ৰত্যক্ষ কৰাত গাড়ীখন গৰু চুৰি কাৰ্য্যত ব্যৱহাৰ কৰিছিল আৰু পলায়ন কৰা ব্যক্তি তিনিজন গৰু চুৰি কাৰ্য্যত জড়িত বুলি নিশ্চিত হয়।
অৱশ্যে গাড়ীখনত কেৱল গৰুৰ গোবৰ আৰু খেৰ পৰি থকাক লৈ চায় স্থানীয় ৰাইজে গৰুচোৰৰ দলটোৱে গাড়ীখনত গৰু ভৰাই কৰবাত বিক্ৰী কৰি অহা বুলি সন্দেহ কৰিছে।
উল্লেখযোগ্য যে কিছুদিনৰ আগতে এই অঞ্চলতেই গাড়ীসহ এজন গৰু চোৰক স্থানীয় ৰাইজে কৰায়ত্ত কৰি আৰক্ষীক চমজাই দিছিল। আনহাতে ৰাইজৰ তৎপৰতাত আৰক্ষীয়ে বহুকেইটা গৰুচোৰক আটক কৰিছে যদিও কেইদিন মানৰ পিছতেই জেলৰ পৰা ওলাই উক্ত গৰুচোৰসমূহে পুনৰ চুৰি কাৰ্য্যত জড়িত হৈ পৰে বুলি ৰাইজে অভিযোগ কৰে।
