বঙাইগাঁও জিলাৰ মাণিকপুৰ আৰক্ষী থানাৰ অন্তৰ্গত মাণিকপুৰ বজাৰ গৃহত চি পি আইৰ মাণিকপুৰ আঞ্চলিক কমিটিৰ উদ্যোগত চৰকাৰৰ জনবিৰোধী নীতি তথা মূল্য বৃদ্ধিৰ বিৰুদ্ধে এক অৱস্থান ধৰ্মঘট কৰি প্ৰতিবাদ সাব্যস্ত কৰে।
বুধবাৰৰ ধৰ্ণা কাৰ্যসূচীত মাণিকপুৰ ৰাজহ চক্ৰ আৰু মহকুমাৰ কাম পূৰ্ণপৰ্যায়ত আৰম্ভ কৰা, মাণিকপুৰৰ পৰা কোকিলা-বাশবাৰী লৈ যোৱা গড়কাপ্তানী পথৰ জৰাজীৰ্ণ কাঠৰ দলং সমুহ পকীকৰণ কৰা, নোৱাপাৰা সূতাকল পুনৰ খোলাৰ ব্যৱস্থা কৰাৰ লগতে চৰকাৰৰ বিৰুদ্ধে বিভিন্ন শ্লোগানেৰে উত্তাল প্ৰতিবাদ সাব্যস্ত কৰে।
ধৰ্ণা কাৰ্যসূচীৰ পিছতে আবেলি চি পি আইৰ কৰ্মীসকলে মাণিকপুৰ খণ্ড উন্নয়ন বিষয়াৰ কাৰ্যালয়লৈ এক প্ৰতিবাদী সমদল উলিয়াই। সমদলকাৰীয়ে খণ্ড উন্নয়ন বিষয়াৰ জৰিয়তে মুখ্য মন্ত্ৰীলৈ দহটা দাবী সম্বলিত এখন স্মাৰক পত্ৰও প্ৰেৰণ কৰে।
স্মাৰক পত্ৰৰ জৰিয়তে ইন্ধনজাত সামগ্ৰীৰ লগতে অত্যাৱশ্যকীয় সামগ্ৰীৰ মূল্যবৃদ্ধি ৰোধ কৰা, কৃষি ঋণ ৰেহাই দিয়া, নাগৰিকত্ব বিধেয়ক বাতিল কৰি ডি ভোটাৰৰ সমস্যা সমাধান কৰা, বিদ্যুৎ মাচুল হ্ৰাস কৰা, জবকাৰ্ড প্ৰাপ্ত শ্ৰমিকক ১০০ দিনৰ কাম নিশ্চিত কৰি ৩০০ টকা মজুৰি দিয়া, দুৰ্নীতি-ছিণ্ডিকেট ৰাজ বন্ধ কৰা, সাম্প্ৰদায়িকতা, নাৰী নিৰ্যাতনৰ বিৰুদ্ধে কঠোৰ স্থিতি গ্ৰহণ কৰা, বন্ধ হৈ থকা কল-কাৰখানা খোলাৰ ব্যৱস্থা কৰি নিবনুৱা সমস্যা সমাধান কৰা, বানপানী আৰু গৰাখহনীয়াক ৰাষ্ট্ৰীয় সমস্যাৰূপে স্বীকৃতি প্ৰদান কৰিবলৈ ৰাজ্য চৰকাৰক আহ্বান জনায়।
ইফালে প্ৰতিবাদী কাৰ্যসূচীত অংশগ্ৰহণ কৰি বিজেপি চৰকাৰৰ জনবিৰোধী নীতিৰ বিৰুদ্ধে তীব্ৰ সমালোচনা কৰে চি পি আই এমৰ নেতা ৰবিন দাস, আৰু তৰেণ ৰায়ে।
