শিক্ষাবিদ উদয়াদিত্য ভৰালীৰ বিয়োগত চিপিআই(এম)ৰ শোক প্ৰকাশ
বিশিষ্ট ইতিহাসবিদ তথা শিক্ষাবিদ, কটন মহাবিদ্যালয়ৰ প্ৰাক্তন অধ্যক্ষ, বাওঁপন্থী আৰু প্ৰগতিশীল আন্দোলনৰ বৌদ্ধিক নেতৃত্ব প্ৰদান কৰা সক্ৰিয় ৰাজহুৱা কৰ্মী উদয়াদিত্য ভৰালীৰ বিয়োগত চিপিআই(এম)ৰ অসম ৰাজ্যিক কমিটিয়ে গভীৰ শোক প্ৰকাশ কৰিছে আৰু স্বনামধন্য চিন্তাবিদ গৰাকীৰ প্ৰতি শ্ৰদ্ধা নিবেদন কৰিছে। পাৰ্টিয়ে তেখেতৰ শোকস্তব্ধ পৰিয়াল আৰু অগণন গুণমুগ্ধৰ প্ৰতি সমবেদনা জ্ঞাপন কৰিছে।
আজি তেখেতৰ মৃত্যু সংবাদ পোৱাৰ পাছতে চিপিআই(এম)ৰ জ্যেষ্ঠ নেতা তথা প্ৰাক্তন বিধায়ক আৰু সাংসদ উদ্ধব বৰ্মন আৰু পাৰ্টিৰ কেন্দ্ৰীয় কমিটিৰ সদস্য ইচ্ফাকুৰ ৰহমান সতীৰ্থ সকলৰ সৈতে প্ৰয়াত উদয়াদিত্য ভৰালীৰ বাসভৱনলৈ গৈ তেখেতৰ মৃতদেহত পুষ্পমাল্য অৰ্পণ কৰি শ্ৰদ্ধা নিবেদন কৰাৰ লগতে তেখেতৰ শোকবিহ্বল পত্নীক সাক্ষাৎ কৰি পাৰ্টিৰ পক্ষৰ পৰা সহমৰ্মিতা প্ৰকাশ কৰে।
চিপিআই(এম)ৰ ৰাজ্যিক কমিটিয়ে প্ৰকাশ কৰা এটা শোক বিবৃতিত কোৱা হয়, বিশিষ্ট বুদ্ধিজীৱী তথা সমাজবিজ্ঞানী গৰাকীয়ে অসমৰ ৰাজনৈতিক-সামাজিক আৰু সাহিত্য-সংস্কৃতিৰ জগতলৈ বিভিন্ন কাম-কাজ আৰু লেখা-মেলাৰে যথেষ্ট অৱদান এৰি গৈছে। বাওঁপন্থী আৰু প্ৰগতিশীল চিন্তা ধাৰাৰে সমৃদ্ধ হৈ তেখেতে অসম তথা অসমৰ জনগণৰ সৰ্বাংগীন বিকাশৰ বাবে অহোপুৰুষাৰ্থ কৰিছিল। অসমৰ বৈচিত্ৰ্যপূৰ্ণ সমাজৰ মাৰ্ক্সবাদী বিশ্লেষণ তুলি ধৰাৰ বাবে তেখেতৰ প্ৰচেষ্টা আছিল অনন্য। বিশেষকৈ অসমৰ বাওঁ আন্দোলনৰ ঐক্য আৰু বিকাশৰ বাবে ভৰালীয়ে একাগ্ৰচিত্তে কাম কৰিছিল। বিভিন্ন কাকত-আলোচনীৰ উপৰি সাপ্তাহিক ‘গণশক্তি’ৰ বিশেষ সংখ্যাবোৰতো ভৰালীয়ে নিয়মীয়াকৈ লেখা-মেলা কৰিছিল।বৰ্তমান পৰিস্থিতিত সাম্প্ৰদায়িক, কৰ্পোৰেটপন্থী আৰু স্বৈৰতান্ত্ৰিক শক্তিসমূহৰ বিৰুদ্ধে বাওঁ-গণতান্ত্ৰিক আৰু ধৰ্মনিৰপেক্ষ শক্তিসমূহক ঐক্যবদ্ধ কৰাৰ বাবে তেখেতে নৰিয়া অৱস্থাতো নিৰলস প্ৰচেষ্টা চলাই আছিল। তেখেতৰ বিয়োগত ৰাজ্যৰ বাওঁপন্থী মহল আৰু গণতান্ত্ৰিক-প্ৰগতিশীল শিবিৰটোৰ অপূৰণীয় ক্ষতি হ’ল বুলি পাৰ্টিয়ে বিবৃতিটোত উল্লেখ কৰে।