চি পি আই শিৱসাগৰ জিলা পৰিষদৰ আহ্বানত শুকুৰবাৰে শতাধিক ৰাইজে শিৱসাগৰ জিলা উপায়ুক্ত কাৰ্যালয় সন্মুখত পে’ট্ৰল-ডিজেল- ৰন্ধন গেছকে ধৰি অত্যাৱশ্যকীয় সামগ্ৰীৰ মূল্যবৃদ্ধিৰ প্ৰতিবাদত তিনিঘণ্টীয়া অৱস্থান ধৰ্মঘটৰ জৰিয়তে বিক্ষোভ প্ৰদৰ্শন কৰি ভাৰত চৰকাৰ আৰু অসম চৰকাৰলৈ স্মাৰকপত্ৰ প্ৰেৰণ কৰে।
বিক্ষোভস্থলীত উপস্থিত থাকি চি পি আই ৰাষ্ট্ৰীয় পৰিষদৰ সদস্য তথা জিলা সম্পাদক কনক গগৈয়ে চৰকাৰক তীব্ৰ সমালোচনা কৰি কয় যে, সকলোৱে কাৰণে বিকাশ কৰা শ্ল’গান দিয়া বিজেপি চৰকাৰে বণিয়া গোষ্ঠীক পে’ট্ৰল ডিজেল ৰন্ধন গেছকে ধৰি অত্যাৱশ্যকীয় সামগ্ৰীৰ দাম বৃদ্ধি কৰি অধিক মুনাফা খাবলৈ দি সাধাৰণ জনতাৰ বিনাশহে কৰিছে ৷
তীব্ৰগতিত ৰাজহুৱা খণ্ডৰ উদ্যোগ- প্ৰতিষ্ঠান সমূহৰ লগতে দেশৰ সম্পদ সমূহ আদানী-আম্বানি নিচিনা ব্যক্তিগত মালিকক গতাই দিয়াৰ ফলত আৰু ক’ভিদ-১৯ ৰ ফলস্বৰূপে কোটি কোটি জনতা সংস্থাপনহীন হ’ল যাৰ ফলত সাধাৰণ জনতাৰ জীৱন নিৰ্বাহত পানীত হাঁহ নচৰা অৱস্থাৰ বিজেপি চৰকাৰখনে কৰিলে বুলিও তেওঁ লগতে কয় ৷
”এই চৰকাৰে বণিক গোষ্ঠীক নাকী লগাব নোৱাৰে সেয়ে আগন্তুক নিৰ্বাচনত বিজেপি নেতৃত্বাধীন মিত্ৰজোঁটৰ চৰকাৰক ৰাইজে উচিত প্ৰত্তুত্যৰ দিব,” কনক গগৈয়ে কয়।
তেওঁ লগতে তিনিখন কৃষক বিৰোধী কৃষি আইন বাতিলৰ দাবীত দিল্লীত গণতান্ত্ৰিক ভাৱে চলি থকা কৃষক আন্দোলনক মষিমূৰ কৰিবলৈ চৰকাৰে ৰাস্তাত গজাল পুতি অগণতান্ত্ৰিক শাসনৰ পাতনি মেলা বুলি চোকা সমালোচনা কৰে ৷
প্ৰতিবাদী কাৰ্যসূচীত অংশ লৈ যুৱনেতা অনুপ গগৈ কৃষক সভাৰ জিলা সভাপতি যোগেশ বুঢ়াগোহাঁই, শ্ৰমিক নেতা মদন বৰুৱা, এআইৱাইএফ ৰ ৰাজ্যিক সম্পাদক অজয় বড়াইও চৰকাৰক চোকা সমালোচনা কৰি বক্তব্য ৰাখে ৷
