প্ৰয়াত চিপিএমৰ সাধাৰণ সম্পাদক সীতাৰাম য়েচুৰী। মৃত্যুৰ সময়ত তেওঁৰ বয়স আছিল ৭২ বছৰ। প্ৰায় এমাহ চিকিৎসাৰ অন্তত বৃহস্পতিবাৰে বিয়লি তেওঁ শেষ উশাহ লয়।
যোৱা ১৯ আগষ্টত শ্বাস-প্ৰশ্বাসজনিত ভয়াৱহ সংক্ৰমণ ধৰা পৰাত চিপিএমৰ সৰ্বভাৰতীয় সাধাৰণ সম্পাদকগৰাকীক দিল্লীৰ সৰ্বভাৰতীয় চিকিৎসা বিজ্ঞান প্ৰতিষ্ঠানত ভৰ্তি কৰোৱা হৈছিল।এই কালচোৱাত আই চি ইউত চিকিৎসাধীন হৈ আছিল। সোমবাৰে নিশা অৱস্থা অধিক বেয়া হোৱাৰ লগে লগে চিকিৎসকে কৃত্ৰিম শ্বাস-প্ৰশ্বাসৰ ব্যৱস্থা ব্যৱহাৰ কৰিবলগীয়া হয়।
প্ৰাক্তন মুখ্যমন্ত্ৰী বুদ্ধদেৱ ভট্টাচাৰ্যই যোৱা ৮ আগষ্টত শেষ নিশ্বাস ত্যাগ কৰে। সেইদিনা দিল্লীত সীতাৰাম য়েচুৰীৰ চকুৰ ছানি পৰা অস্ত্ৰোপচাৰ কৰা হয়।যাৰ বাবে বুদ্ধবাবুৰ শেষ যাত্ৰালৈ আহিব নোৱাৰিলে য়েচুৰী। ২২ আগষ্টত নেতাজী ইনড’ৰ ষ্টেডিয়ামত বুদ্ধবাবুৰ স্মৃতিচাৰণ অনুষ্ঠানত উপস্থিত থাকিব নোৱাৰিলে। তাৰ পাছত হাওঁফাওঁৰ সংক্ৰমণত য়েচুৰীক এইমছত ভৰ্তি কৰোৱা হয়।
২০২১ চনত সীতাৰাম য়েচুৰীৰ জ্যেষ্ঠ পুত্ৰ আশীষৰ ক’ভিডত মাত্ৰ ৩৫ বছৰ বয়সত মৃত্যু হৈছিল। তেওঁৰ হাওঁফাওঁৰ জটিল সংক্ৰমণ হৈছিল। সন্তান হেৰুৱাৰ দুখ পাহৰি সীতাৰামে নিজকে দলীয় কামত ব্যস্ত ৰাখিলে। বৃহস্পতিবাৰে মুখ্যমন্ত্ৰী মমতা বেনাৰ্জী আৰু অভিষেক বেনাৰ্জীয়ে তেওঁৰ মৃত্যুৰ খবৰ পাই শোক প্ৰকাশ কৰিছে। এক্স হেণ্ডেলত মমতাই লিখিছে, এইজন জ্যেষ্ঠ ৰাজনীতিবিদৰ মৃত্যুৰ ফলত ভাৰতৰ জাতীয় ৰাজনীতিত প্ৰভাৱ পৰিব।
১৯৫২ চনৰ ১২ আগষ্টত চেন্নাইত জন্মগ্ৰহণ কৰিছিল য়েচুৰীয়ে। জে এন ইউত অধ্যয়ন কৰি থাকোঁতে তেওঁ চি পি এমৰ সদস্যপদ লৈ পূৰ্ণকালীন ৰাজনীতিত যোগদান কৰাৰ সিদ্ধান্ত লয়। ২০০৫ চনৰ পৰা ২০১৭ চনলৈ বংগৰ পৰা নিৰ্বাচিত ৰাজ্যসভাৰ সাংসদ আছিল য়েচুৰী।
