কাৰোবাৰ হত্যাৰ ষড়যন্ত্ৰৰ বলি হ’ল নেকি ক্ৰিকেট কিংম্বদন্তি শ্বেন ৱাৰ্ণ?
বিশ্বপ্ৰসিদ্ধ লেগ স্পীনাৰজনৰ অস্বাভাৱিক মৃত্যুক লৈ চাঞ্চল্য চলি থকাৰ মাজতে আহিছে আন এক নতুন চাঞ্চল্যজনক তথ্য। এই তথ্য আগবঢ়াইছে থাইলেণ্ডৰ আৰক্ষীয়ে। জানিব পৰা মতে, থাইলেণ্ডৰ আৰক্ষীয়ে ৱাৰ্ণৰ মৃতদেহৰ কাষত তেজৰ দাগ দেখা পাইছে। কেৱল সেয়াই নহয়, গা ধোৱা টাৱেলতো তেজৰ দাগ পোৱা গৈছে।
উল্লেখযোগ্য যে যোৱা শুকুৰবাৰে থাইলেণ্ডৰ এটা বিলাসী আবাসগৃহত মৃত্যু হৈছিল ৫২ বৰ্ষীয় লেগ স্পীনাৰজনৰ।
প্ৰথম অৱস্থাত হৃদযন্ত্ৰ বিকল হোৱাৰ ফলতে তেওঁৰ এনেদৰে হঠাৎ মৃত্যু হোৱা বুলি কোৱা হৈছিল। কিন্তু তেজৰ দাগ পোৱাৰ পাছতে সমগ্ৰ ঘটনাৱলীয়ে অন্য এক মোৰ লাভ কৰিছে।
অৱশ্যে থাইলেণ্ডৰ আৰক্ষীয়ে জনোৱামতে, ৱাৰ্ণে মৃত্যুৰ সময়ত মুখেৰে তেজ নিৰ্গত কৰিছিল। ৱাৰ্ণক এনেদৰে অচেতন অৱস্থাত পাই তেওঁৰ বন্ধু বৰ্গই চিপিআৰ দিবলৈ চেষ্টা কৰে। তাৰফলতে ঘৰৰ মজিয়া আৰু টাৱেলত তেজৰ দাগ পোৱা গৈছে বুলি আৰক্ষীয়ে সন্দেহ কৰিছে।
উল্লেখযোগ্য যে ক্ৰিকেটৰ ইতিহাসত শ্বেন ৱাৰ্ণক এজন কিংম্বদন্তি খেলুৱৈ হিচাপে আখ্যা দিয়া হয়। নিজৰ যাদুকৰী লেগ স্পিন বলিঙেৰে তেওঁ অজস্ৰ অনুৰাগীক মুহি ৰাখিছিল।
সেইবাবেই স্বাভাৱিকতে ৱাৰ্ণৰ মৃত্যুক লৈ তীব্ৰ চাঞ্চল্যৰ সৃষ্টি হৈছে।
