শেহতীয়াভাৱে অসমৰ কেইবাটাও বাঙালী সংগঠনে গুৱাহাটী গণ সমাৱেশ অনুষ্ঠিত কৰাৰ বিষয় লৈ উত্তপ্ত হৈ আছে ৰাজ্যৰ পৰিস্থিতি। তেনে সময়তে এই সমাৱেশৰ বাবে যো-জা চলোৱা ২৬টা বাঙালী সংগঠনৰ উমৈহতীয়া মঞ্চ বুলি দাবী কৰা নাগৰিক অধিকাৰ সুৰক্ষা মঞ্চ, অসম চমুকৈ চি আৰ পি এফ-এৰ সাংগঠনিক স্থিতিক লৈ মিথ্যাচাৰ পোহৰলৈ আহিছে।
নিজকে ২৬টা বাঙালী সংগঠনৰ উমৈহতীয়া মঞ্চ বুলি পৰিচয় দিয়া চি আৰ পি এফ-এত প্ৰকৃততে নাই ২৬টা সংগঠন। চি আৰ পি এফ-এৰ নেতাৰ তথ্যতেই প্ৰকাশ পাইছে এই কথা। আমাহ হাতত পৰা তথ্য অনুসৰি ১৪ ৰ পৰা ১৬টা সংগঠনহে আছে চি আৰ পি এফ-এত।
২৬টা বাঙালী সংগঠন একত্ৰিত হৈ থকাৰ কথা প্ৰকাশ পাই অহাৰ বিপৰীতে চি আৰ পি এফ-এত কোনকেইটা সংগঠন আছে এই বিষয়ে জানিবলৈ যৌথ মঞ্চখনৰ আহ্বায়ক তথা বাঙালী যুক্ত ছাত্ৰ ফেডাৰেইশ্যনৰ মুখ্য উপদেষ্টা সুকুমাৰ বিশ্বাসৰ সৈতে নৰ্থ-ইষ্ট নাওৰ সাংবাদিকে যোগাযোগ কৰাত তেওঁ কয়, “নাগৰিক অধিকাৰ সুৰক্ষা মঞ্চ, অসমত ২৬টাতকৈ অধিক সংগঠন আছে, তথাপিতো ২৬টা মূল সংগঠনক আমি ধৰিছো। তাৰ ভিতৰত বাঙালী যৌথ সমন্বয় সমিতিৰ অন্তৰ্ভুক্ত ১৪টা সংগঠন আছে। লগতে বেংগলী য়ুনাইটেড ফ’ৰাম অব আছামৰ (বুফা) অন্তৰ্ভুক্ত ১৪টা সংগঠন চি আৰ পি এফ-এৰ অন্তৰ্ভুক্ত হৈছে।”
সুকুমাৰ বিশ্বাসে বাঙালী যৌথ সমন্বয় সমিতিৰ অন্তৰ্ভুক্ত ১৪টা সংগঠনৰ নাম জানিবলৈ দিয়ে যদিও তেওঁ ক’ব নোৱাৰিলে বেংগলী য়ুনাইটেড ফ’ৰাম অব আছামৰ (বুফা)ৰ অনৰ্ভুক্ত সংগঠনকেইটাৰ নাম। ইয়াৰ বিপৰীতে সদৌ অসম বাঙালী পৰিষদ আৰু আমৰা বাঙালী ফ্ৰণ্ট নামৰ দুটা সংগঠনো চি আৰ পি এফ-এৰ অন্তৰ্ভুক্ত বুলি তেওঁ জানিবলৈ দিয়ে।
কিন্তু বহুকেইটা বাঙালী সংগঠনৰ উমৈহতীয়া মঞ্চ বেংগলী য়ুনাইটেড ফ’ৰাম অব আছামৰ (বুফা) অন্তৰ্ভুক্ত নহয় চি আৰ পি এফ-এত। এই কথা কয় ‘বুফা’ৰ কৰ্ণধাৰ সমিতিৰ সদস্য শান্তনু মুখাৰ্জীয়ে।
মুখাৰ্জীয়ে কয়, “নাগৰিক অধিকাৰ সুৰক্ষা মঞ্চ, অসম চমুকৈ চি আৰ পি এফ-এত বুফা অন্তৰ্ভুক্ত বুলি কোৱা কথাটো সম্পূৰ্ণ মিছা। আমি বৰাক আৰু ব্ৰহ্মপুত্ৰ উপত্যকাৰ মুঠ ২৫টা বাঙালী সংগঠন পূৰ্বৰে পৰা ‘বুফা’ হিচাপে একত্ৰিত হৈয়েই আছো, গতিকে নতুনকৈ অন্য এখন উমৈহতীয়া মঞ্চৰ অন্তৰ্ভুক্ত হোৱাৰ কোনো কথাই আহি নপৰে।”
তেওঁ কয় যে এই সন্দৰ্ভত যোৱা ২৩ ছেপ্টেম্বৰত গুৱাহাটীৰ হোটেল ভি আই পি ইণ্টাৰনেশ্যনেলত এখন সভা অনুষ্ঠিত হৈছিল আৰু তাত ‘বুফা’ক আমন্ত্ৰন জনোৱা হৈছিল। এই সভাখনৰ উদ্যোগ লৈছিল বিধায়ক শিলাদিত্য দেব, সুকুমাৰ বিশ্বাস প্ৰমুখ্য কেইবাজনো নেতাই। এই সভাখনত বুফাৰ প্ৰতিনিধিয়ে অংশ লৈছিল যদিও তেওঁলোকে চি আৰ পি এফ-এ নামৰ নৱগঠিত উমৈহতীয়া মঞ্চখনৰ অন্তৰ্ভুক্ত হোৱা নাছিল। লগতে তাৰ পাছৰ কোনো সভা বা কাৰ্যসূচীতেই বুফাই অংশ লোৱা নাই বুলিও মুখাৰ্জীয়ে স্পষ্ট কৰি দিয়ে।
উল্লেখ্য যে, যোৱা ২৫ অক্টোবৰত অসম সাহিত্য সভাৰ সৈতে সমাৱেশ পাতিব বিচৰা সংগঠনকেইটাই আলোচনা কৰিবলৈ যোৱাৰ সময়তো তেওঁলোকৰ লগত আছিল মাত্ৰ ১০/১১টা সংগঠনহে।
ইয়াৰ উপৰি, চি আৰ পি এফ-এয়ে গুৱাহাটীত অনুষ্ঠিত কৰিব বিচৰা সমাবেশখনৰ প্ৰতি সমৰ্থন নাই ‘বুফা’ৰ। এই সন্দৰ্ভত শান্তনু মুখাৰ্জীয়ে কয়, “আমি জাতি, জনগোষ্ঠী বা সম্প্ৰদায়ৰ মাজত সংঘাত সৃষ্টি কৰিব পৰা সমাৱেশ অনুষ্ঠিত হোৱাটো নিবিচাৰো।”
অৱশ্যে নাগৰিকত্ব সংশোধনী বিধেয়কক লৈ মুখাৰ্জীয়ে কৌশলী স্থিতি লৈ এই বিধেয়কৰ গইনা লৈ অসমীয়াভাষী আৰু বাংলাভাষী মানুহৰ মাজত সম্প্ৰীতি বিঘ্নিত হ’ব নালাগে বুলি মন্তব্য কৰে।
