‘লিভ ইন’ত থকা প্ৰেমিকা আৰক্ষী বিষয়াক হত্যা কৰি থানাত আত্মসমৰ্পণ চি আৰ পি এফ জোৱানৰ

এগৰাকী মহিলা আৰক্ষী বিষয়াক হত্যা কৰাৰ অভিযোগ উত্থাপন হৈছে তেওঁৰ প্ৰেমিকৰ বিৰুদ্ধে। গুজৰাটৰ কুচ জিলাত এই ঘটনা সংঘটিত হৈছে। এই ঘটনাত আৰক্ষী বিষয়া অৰুণা নাটু যাদৱ (২৫)ৰ মৃত্যু হৈছে। অভিযুক্ত দিলীপ ডাংচিয়া চি আৰ পি এফৰ কনিষ্টবল।

অভিযোগ অনুসৰি শুকুৰবাৰে নিশা অৰুণাক হত্যা কৰাৰ পিছত শনিবাৰে পুৱা দিলীপে আঞ্জাৰ থানাত আত্মসমৰ্পণ কৰে। সমগ্ৰ ঘটনাৰ তদন্ত আৰম্ভ কৰিছে আৰক্ষীয়ে।

আৰক্ষী সূত্ৰৰ পৰা জানিব পৰা মতে, অভিযুক্ত দিলীপে আত্মসমৰ্পণ কৰা কুচৰ একেখন আঞ্জাৰ থানাতে অৰুণা সহকাৰী উপ পৰিদৰ্শক (এ এছ আই) হিচাপে কৰ্মৰত আছিল। অৰুণা আৰু দিলীপ লিভ ইন সম্পৰ্কত আছিল।

আৰক্ষীয়ে জনোৱা মতে, শুকুৰবাৰে নিশা ঘৰত দিলীপৰ সৈতে অৰুণাৰ কিবা বিষয়ক লৈ কাজিয়া হৈছিল। অভিযোগ অনুসৰি, কাজিয়াৰ সময়ত দিলীপে খঙতে অৰুণাক ডিঙি চেপি হত্যা কৰে।

 ইয়াৰ পিছতে শনিবাৰে পুৱা দিলীপে থানালৈ আহি সমগ্ৰ ঘটনা আৰক্ষীৰ আগত স্বীকাৰ কৰে। আঞ্জাৰ সংমণ্ডলৰ উপ-আৰক্ষী অধীক্ষক মুকেশ চৌধুৰীয়ে শনিবাৰে এক বিবৃতিত কয় যে, “২০২১ চনত ইনষ্টাগ্ৰামৰ জৰিয়তে দিলীপে অৰুণাক লগ পাইছিল। কেইবাবছৰ ধৰি তেওঁলোক একেলগে বাস কৰিছিল। দুয়োজনে বিয়াৰ পৰিকল্পনাও কৰিছিল।”