এক গোচৰত অভিযুক্ত দুগৰাকী ব্যক্তিক গ্ৰেপ্তাৰ কৰাৰ উদ্দেশ্যে আৰক্ষীয়ে চলোৱা অভিযানৰ সময়তে আৰক্ষীৰ বুট জোতাৰ গচকত এটি নৱজাতকৰ মৃত্যু হোৱাৰ গুৰুতৰ অভিযোগ উঠিছে। ঝাৰখণ্ডৰ গিৰিডিহ জিলাত বুধবাৰে সংঘটিত হৈছে এই চাঞ্চল্যকৰ ঘটনা।
শিশুটিৰ পৰিয়ালে তোলা এই গুৰুতৰ অভিযোগৰ পিছতে ৰাজ্যখনৰ মুখ্যমন্ত্ৰী হেমন্ত ছোৰেনে তদন্তৰ নিৰ্দেশ দিয়ে। প্ৰকাশিত খবৰ অনুসৰি, দেওৰী আৰক্ষী থানাৰ অন্তৰ্গত কোশোদিংঘী নামৰ এখন গাঁৱৰ এক গৃহত আৰক্ষীৰ এটা দলে দুগৰাকী ব্যক্তিক গ্ৰেপ্তাৰ কৰাৰ উদ্দেশ্যে অভিযান চলাইছিল।
সামাজিক মাধ্যমত এই ঘটনাৰ এক ভিডিঅ’ ভাইৰেল হোৱাৰ পিছতে মুখ্যমন্ত্ৰী হেমন্ত ছোৰেনে তদন্তৰ নিৰ্দেশ দিয়ে। ভিডিঅ’টোত ভূষণ পাণ্ডে নামৰ ব্যক্তিগৰাকীয়ে পুৱা ৩.২০ বজাত তেওঁৰ বাসগৃহত আৰক্ষীৰ লোকে অভিযান চলোৱাৰ অভিযোগ উত্থাপন কৰা দেখা গৈছে।
তেওঁ অভিযোগ কৰা মতে, আৰক্ষীৰ হাতৰ পৰা ৰক্ষা পৰাৰ উদ্দেশ্যে তেওঁ পলায়ন কৰিছিল আৰু ঘৰৰ মহিলাসকলো লৰালৰিকৈ ওলাই গৈছিল। চাৰিদিনীয়া শিশুটি শুই থকাৰ সময়তে আৰক্ষীয়ে ঘৰটোত তালাচী আৰম্ভ কৰে আৰু আৰক্ষীৰ গচকত কেঁচুৱাটোৰ মৃত্যু হয় বুলি তেওঁ দাবী কৰে।
গিৰিডিহ জিলাৰ আৰক্ষী অধীক্ষকগৰাকীয়ে ঘটনা সন্দৰ্ভত উল্লেখ কৰা মতে, মৃত কেঁচুৱাটোৰ ককাক ভূষণ পাণ্ডে আৰু আন এগৰাকী ব্যক্তিৰ বিৰুদ্ধে জামিনবিহীন গ্ৰেপ্তাৰী পাৰোৱানা জাৰি হোৱাৰ বাবে তেওঁলোকক গ্ৰেপ্তাৰৰ বাবে চাৰিৰ পৰা পাঁচগৰাকী আৰক্ষী জোৱান ব্যক্তিগৰাকীৰ ঘৰত উপস্থিত হৈছিল বুলি আৰক্ষী অধীক্ষকগৰাকীয়ে জানিবলৈ দিয়ে।
তেওঁ লগতে উল্লেখ কৰা মতে, নিহত শিশুটি জন্ম হোৱা মাত্ৰ চাৰিদিনহে হৈছিল। প্ৰাথমিক পৰীক্ষাৰ সময়ত শিশুটিৰ মৃতদেহত বাহ্যিক আঘাত দেখা পোৱা নাই যদিও মৃতদেহৰ মৰণোত্তৰ পৰীক্ষা কৰা হ’ব তেওঁ সদৰী কৰে।
মৰণোত্তৰ পৰীক্ষাৰ প্ৰতিবেদন আহিলেহে প্ৰকৃততে কিদৰে শিশুটিৰ মৃত্যু হৈছিল, সেই কথা ক’ব পৰা হ’ব বুলি আৰক্ষী অধীক্ষকগৰাকীয়ে লগতে কয়। সঠিক ভিডিঅ’গ্ৰাফীৰে দণ্ডাধীশৰ তত্বাৱধানত চিকিৎসকৰ এটা দলে মৰণোত্তৰ পৰীক্ষা কৰিব বুলিও তেওঁ জানিবলৈ দিছে।
সাংবাদিকৰ সৈতে বাৰ্তালাপত আৰক্ষী অধীক্ষক গৰাকীয়ে কয়, “কোনো আৰক্ষীয়ে কেঁচুৱাটোক গচকা বুলি এতিয়ালৈকে আমাৰ হাতত কোনো তথ্য নাই। যদি অভিযোগ সঁচা বুলি ধৰা পৰে, তেতিয়া এনে ভুল কৰা লোকসকলক ৰেহাই দিয়া নহ’ব।”
