তেওঁ আৰু এতিয়া অধিনায়ক নহয়। কিন্তু তেওঁতো দলত আছে। যোৱাবাৰ তেওঁৰ দল চেম্পিয়ন হৈছিল। মাত্ৰ যোৱাবাৰেই নহয়, পাঁচবাৰকৈ ট্ৰফী আনি দিছে চেন্নাইক। শুকুৰবাৰৰ দিনটোতো মাজে মাজে হাত জোকাৰি চকুৰ ইংগিতেৰে নেতৃত্ব দিছিল। তেওঁ হৈছে মহেন্দ্ৰ সিং ধোনি।
অধিনায়ক ঋতুৰাজ গাইকোৱাডে এইজন ব্যক্তিৰ উজ্জ্বল উপস্থিতিত আত্মবিশ্বাসেৰে চেম্পিয়নৰ দৰে আৰম্ভণি কৰিলে। ঘৰুৱা অনুৰাগীৰ সন্মুখত ৰয়েল চেলেঞ্জাৰ্ছ বাংগালুৰুক পৰাস্ত কৰি এইবাৰৰ আই পি এল অভিযান আৰম্ভ কৰিলে চেন্নাই ছুপাৰ কিংছে।
চিপকত চেন্নাইৰ মেচ মানে অনুৰাগীৰ ধ্বনিত কাণতাল মৰা পৰিৱেশ। তাতেই প্ৰতিপক্ষই আধা আত্মবিশ্বাস হেৰুৱাই পেলায়। শুকুৰবাৰে আই পি এলৰ ১৭ সংখ্যক ছিজনৰ উদ্বোধনী মেচখনো ইয়াৰ ব্যতিক্ৰম নাছিল।
বিৰাট কোহলী যিমানেই ক্ৰিকেটপ্ৰেমীৰ বাবে চকুৰ মণি নহওঁক কিয়, ধোনীৰ দলৰ অনুৰাগীৰ বাবে মাথোঁ এগৰাকী প্ৰতিপক্ষৰ বেটছমেন । গতিকে যেতিয়া বাউণ্ডেৰী লাইনত কোহলীৰ শ্বটটো অজিংক্য ৰাহানে আৰু ৰচিন ৰবিন্দ্ৰৰ মসৃন কেচলৈ পৰিণত হ’ল, তেতিয়া চিপকৰ শব্দকম্পই সকলো স্তৰ অতিক্ৰম কৰিলে।
শেষত আৰ চি বি এনে এটা পৰ্যায় পালেগৈ যে অনুজ ৰাৱট আৰু দীনেশ কাৰ্তিকৰ অতি মূল্যৱান অংশীদাৰিত্বইহে তেওঁলোকে যুঁজ দিয়াৰ বাবে স্কোৰ এটাত উপনীত হ’ল। কিন্তু শেষ ৰক্ষা নহ’ল।
কিন্তু এই দিনটো নিঃসন্দেহে কেৱল চেন্নাইৰে নহয়,বাংলাদেশৰ বাবেও আছিল উদযাপনৰ দিন। কাৰণ অৱশ্যেই মুস্তাফিজুৰ। কোহলি (২১), ডু প্লেছিছ (৩৫), ৰজত পাটিদাৰ (০) আৰু কেমেৰন গ্ৰীনক ১৮ (১৮) নিজৰ নিখুঁত বলিঙৰ জৰিয়তে এজন এজনকৈ পেভিলিয়নলৈ ওভতাই পঠিয়াইছিল মুস্তাফিজুৰ। ৪ অভাৰত ২৯ ৰান দি ৪ টা উইকেট দখল কৰে।
চেন্নাইৰ বাবে বাকী কামখিনি শিৱম ডুবে (৩৪*) আৰু ৰবীন্দ্ৰ জাদেজাই (২৫*) সম্পূৰ্ণ কৰে। ৰাচিনে ৩৭ ৰান কৰি উভতি যোৱাৰ সময়ত চেন্নাই কিছু সময়ৰ বাবে অলপ শিথিল হৈ পৰে। কিন্তু ডুবে আৰু জাডেজাৰ আক্ৰমণাত্মক বেটিঙেৰে চেন্নাইয়ে মেচখন নিজৰ হাতলৈ নিলে।
অৱশ্যে এই দিনটোত চেন্নাইৰ অনুৰাগীৰ এটাই আক্ষেপ, যদিও উইকেটৰক্ষক ধোনীয়ে ২২ গজৰ পুৰণি স্মৃতি ঘূৰাই আনিলে, তথাপিও তেওঁলোকে বেটেৰে ধোনিৰ বিস্ফোৰণ দেখাৰ সুযোগ নাপালে।
টছত জয়ী হোৱাৰ পিছত ডু প্লেছিছে কিয় বেটিং কৰাৰ সিদ্ধান্ত লৈছিল তাৰো প্ৰশ্ন উত্থাপন হৈছে। আন প্ৰতিবাৰৰ দৰে দলটোৰ তাৰকা বেটছমেনসকলে এইবাৰো অভিযানৰ আৰম্ভণিতে নিৰাশ কৰিছিল। স্মৃতি মান্ধনাই মহিলা আই পি এলত আৰ চি বিক চেম্পিয়ন কৰি তুলিলে। কিন্তু উদ্বোধনী মেচত কোহলীৰ পৰাজয়ে পুনৰ বেংগালুৰু অনুৰাগীৰ সপোনত আঘাত হানিলে।
সংক্ষিপ্ত স্কোৰঃ
ৰয়েল চেলেঞ্জাৰ্ছ বাংগালুৰুঃ ১৭৩/৬ (অনুজ-৪৮, কাৰ্তিক-৩৮*)
চেন্নাই ছুপাৰ কিংছ: ১৭৬/৪ (ৰাচিন-৩৭)
চেন্নাই ছুপাৰ কিংছে ৬ উইকেটত জয়লাভ কৰে।
