শিৱসাগৰৰ অন্যতম সাংস্কৃতিক কৰ্মী, ড০ ভূপেন হাজৰিকাৰ অনুগামী তথা জিলাখনৰ সমাজ-সংস্কৃতিলৈ যথেষ্ট বৰঙনি আগবঢ়োৱা ভাস্কৰ দত্তৰ মৃত্যুত শোকৰ ছাঁ পৰিছে চহৰখনত। ১৯ ফেব্ৰুৱাৰিত শিৱসাগৰৰ এখন ব্যক্তিগত নাৰ্ছিং হ’মত ৬২ বছৰ বয়সত মৃত্যু হয় দত্তৰ।
চহৰখনৰ ষ্টেইশ্যন চাৰি আলিৰ প্ৰবীণ মুক্তযোদ্ধা, শিক্ষাবিদ প্ৰয়াত ভগৱান চন্দ্ৰ দত্তৰ পুত্ৰ ভাস্কৰ দত্ত ভূপেন্দ্ৰ সংগীতৰ সাধক হোৱাৰ উপৰি গীতিকাৰ সুৰকাৰ, নিবন্ধকাৰ হিচাপেও সমাজলৈ তেওঁৰ বৰঙনি আছে। ১৯৭২ চনতে গুলস্তা হামাৰা ছবিৰ শ্বুটিঙৰ সময়ত ড০ ভূপেন হাজৰিকাৰ সংস্পৰ্শলৈ আহিছিল আৰু তেতিয়াৰ পৰাই ভূপেনদাৰ ভক্ত হৈ পৰিছিল ভাস্কৰ দত্ত। ভূপেনদাৰ লগত দিহিঙে-দিপাঙে ঘূৰি ফুৰোতেই তেওঁ চাহ বাগিচাৰ মেনেজাৰৰ চাকৰি হেৰুৱায়।
সুধাকণ্ঠই ভাস্কৰ দত্তক ষ্টেইশ্যন চাৰিআলিত সম্পূৰ্ণ অসমীয়া আৰু জনজাতীয় ৰুচিৰ থলুৱা খাদ্যৰ ‘চাংমাইশাল’ নামৰ এখন হোটেল খুলি দিছিল। বহুদিন ধৰি বন্ধ হৈ থকা চাংমাইশাল হোটেলক পুনৰ খুলিবলৈ যো-জা চলাই আছিল যদিও সেই সপোন পূৰণ হোৱাৰ পূৰ্বেই দত্তই মেলানি মাগে।
১৯৮০ চনত ভাস্কৰ দত্তই we are Indian, we are Indian আৰু Oh! oh! my dear motherland, you have been our since she time began শীৰ্ষক ইংৰাজী গান দুটি সুৰ আৰু ৰচনা কৰিছিল। দত্তই মুঠ প্ৰায় তিনি কুৰি গীত ৰচনা কৰিছিল। তেওঁ আকাশবাণীৰো গীতিকাৰ আছিল। ১৯৮৫ চনত ভূপেন হাজৰিকাই ৰিমেক কৰা ফণী শৰ্মাৰ ‘চিৰাজ’ ছবিত অভিনয় কৰাৰ লগতে কণ্ঠদানো কৰিছিল তেওঁ। সকলো দিশতে ভূপেনদাক অনুসৰণ কৰা ভাস্কৰ দত্তক সকলোৱে জুনিয়ৰ ভূপেন হাজৰিকা বুলিয়েই মাতিছিল।
সাংস্কৃতিক কৰ্মীজনে ভূপেনদাৰ আদৰ্শ, সংগীত প্ৰচাৰৰ বাবে ভূপেনদাৰ দল আৰু মহাত্মা গান্ধীৰ আদৰ্শ প্ৰচাৰৰ বাবে বাপুজী দল নামৰ দুটা অনুষ্ঠানৰ জন্ম দিছিল। গণৰাজ্য দিৱস আৰু গান্ধী জয়ন্তীত দেশপ্ৰেমমূলক গীত আৰু ভূনেদাৰ জন্মদিন আৰু মৃত্যুদিনত ভূপেনদাৰ গীত বজাই নিজৰ পুৰণি ভেণ্টিজ গাড়ীৰে সমগ্ৰ শিৱসাগৰ পৰিভ্ৰমণ কৰা অভ্যাস আছিল ভাস্কৰ দত্তৰ।
অবিৰত শিল্পী জীৱন, সাহিত্য জীৱন আৰু সমাজিক কৰ্মৰাজিৰ বাবে দিল্লীৰ এটা অনুষ্ঠানে দত্তক ‘ভাৰত জ্যোতি’ উপাধি প্ৰদান কৰাৰ লগতে দিল্লীৰ শিখ সমাজে ‘শ্ৰেষ্ঠ নাগৰিক’ উপাধি প্ৰদান কৰিছিল এইজন শিৱসাগৰৰ সন্তানক।
জিলাখনৰ এইগৰাকী সুযোগ্য সন্তানৰ মৃত্যুত সমগ্ৰ শিৱসাগৰত শোকৰ ছাঁ পৰিছে। ১৯ ফেব্ৰুৱাৰিৰ বিয়লি ২ বজাত তেখেতৰ ঘৰত ৰাজহুৱা শ্ৰদ্ধাঞ্জলি অনুষ্ঠানত শিৱসাগৰৰ বহু দল-সংগঠন তথা ব্যক্তিয়ে শিল্পীগৰাকীলৈ শেষ শ্ৰদ্ধা নিবেদন কৰে।
