শেহতীয়াকৈ অসমত উজান উঠিছে তৰুণ প্ৰজন্মৰ প্ৰতিভাৰ। ইটোৰ পিছত সিটোকৈ অসমৰ সাংস্কৃতিক, শৈক্ষিক, সামাজিক আৰু ক্ৰীড়াৰ জগতলৈ সুনাম কঢ়িয়াই আনিছে বিভিন্ন প্ৰতিভাধৰ তৰুণ-তৰুণীয়ে। বিভিন্ন প্ৰতিযোগিতাৰে নিজৰ প্ৰতিভাক জিলিকাই তুলিবলৈ যেন আজিৰ প্ৰজন্ম বদ্ধপৰিকৰ।
এইদৰে ভাৰত চৰকাৰৰ সাংস্কৃতিক মন্ত্ৰালয়ে উদীয়মান শিল্পীসকললৈ প্ৰদান কৰি অহা ৰাষ্ট্ৰীয় জলপানি লাভ কৰিবলৈ সক্ষম হৈছে অসমৰ অন্যতম এগৰাকী সম্ভাৱনাময়ী প্ৰতিভা ডেইজী গগৈয়ে।
স্কুলীয়া সময়ৰ পৰাই নিয়মিত অধ্যয়নৰ লগতে নৃত্য-গীত-অভিনয় কৰি ভালপোৱা ডেইজীয়ে এই জলপানি লাভ কৰিছে গুৰু প্ৰবীণ কুমাৰ শইকীয়াৰ তত্ত্বাৱধানত ‘লোকনাট্য’ৰ শাখাত।
গোগামুখস্থিত ঐতিহাসিক সোৱণশিৰি মহাবিদ্যালয়ৰ পৰা স্নাতক ডেইজীয়ে ২০২০ বৰ্ষত ডিব্ৰুগড় বিশ্ববিদ্যালয়ৰ অন্তৰ্গত ড° ভূপেন হাজৰিকা পৰিৱেশ্য কলা অধ্যয়ন কেন্দ্ৰৰ পৰা নাট্যকলা বিভাগত স্নাতকোত্তৰ ডিগ্ৰী গ্ৰহণ কৰে। ইয়াৰ পৰাই তেওঁ যশস্বী পৰিচালক ক্ৰমে জ্যোতিনাৰায়ণ নাথ, গুণমণি শইকীয়া, প্ৰবীণ কুমাৰ শইকীয়া, প্ৰাঞ্জল বুঢ়াগোঁহাই, ৰশ্মিৰেখা শইকীয়াৰ পৰিচালনাত বিভিন্ন মঞ্চত নাটক, টিভি ধাৰাবাহিক আদিত বলিষ্ঠ অভিনয়ৰে আত্ম প্ৰকাশ কৰিবলৈ সক্ষম হৈছে।
তদুপৰি সংগীত নাটক অকাডেমীয়ে উৰিষ্যাত অনুষ্ঠিত কৰা ১৯ সংখ্যক ৰাষ্ট্ৰীয় নাট্য মহোৎসৱ, কেনফেষ্ট-২০২২ আৰু চলিত বৰ্ষত ৰাষ্ট্ৰীয় নাট্য বিদ্যালয় (এন এছ ডি) নতুন দিল্লীয়ে আগৰতলাত আয়োজন কৰা শিশু নাট্য মহোৎসৱ, জচনেবচপনত আৰু মণিপুৰৰ ষষ্ঠসংখ্যক খোনদংবাম বজেন্দ্ৰ নাট্যমহোৎসৱত অভিনয় কৰি শ্ৰোতা-দৰ্শকৰ প্ৰশংসা বুটলিবলৈ সক্ষম হৈছে।
অভিনয়ৰ উপৰিও বিহুনাচ আৰু সত্ৰীয়া নৃত্যতো পাৰ্গতালি থকা ডেইজীয়ে অসম চৰকাৰৰ বিহুনাচৰ বিশ্ব অভিলেখত কামৰূপ(নগৰ) হৈ প্ৰতিনিধিত্ব কৰিছে। তদুপৰি ক’ৰ’না কালত সাংস্কৃতিক সংস্থা ‘ৰ’দ‘-এ আয়োজন কৰা অনলাইন সদৌ অসম বিহুনামৰ প্ৰতিযোগিতাত তেওঁ প্ৰথম স্থান লাভ কৰিছিল।
উল্লেখ্য গোগামুখ নিবাসী ডেইজী গগৈ প্ৰয়াত বদন গগৈ আৰু ৰীমা গগৈৰ দ্বিতীয় কন্যা। ডেইজীৰ এই প্ৰাপ্তিত লখিমপুৰ-ধেমাজীৰ সংস্কৃতিপ্ৰেমী ৰাইজ উৎসাহিত হোৱাৰ লগতে গোগামুখীয়া ৰাইজে ডেইজীক উষ্ম অভিনন্দন জনোৱা পৰিলক্ষিত হৈছে।
