ৰাজ্যৰ বিজেপি নেতৃত্বাধীন চৰকাৰখনে কৌশলেৰে পিছুৱাই থকাৰ পিছত উচ্চ ন্যায়ালয়ৰ নিৰ্দেশনা শিৰোধাৰ্য্য কৰি উত্তৰ কাছাৰ স্বায়ত্তশাসিত পৰিষদৰ নিৰ্বাচন পাতিবলৈ আগ বাঢ়িছে। আজি ৰাজ্যিক নিৰ্বাচন আয়ুক্তই পৰিষদখনৰ নিৰ্বাচনৰ দিন ঘোষণা কৰাৰ লগতে এই সম্পৰ্কীয় নিৰ্বাচনী অধিসূচনা জাৰি কৰে।
নিৰ্বাচনী আয়ুক্তৰ ঘোষণাৰ ভিত্তিত আজি জিলাখনৰ উপায়ুক্ত তথা নিৰ্বাচনী বিষয়া অমিতাভ ৰাজখোৱাই এখন সংবাদমেল দি নিৰ্বাচনৰ সবিশেষ সংবাদ মাধ্যমক জানিবলৈ দিয়ে।
সেই অনুসৰি অহা ১৯ জানুৱাৰি, ২০১৯ত পৰিষদখনৰ নিৰ্বাচন অনুষ্ঠিত হ’ব। উক্ত দিনা পুৱা ৭ বজাৰ পৰা ৩ বজালৈকে ভোটগ্ৰহণ চলিব।
নিৰ্বাচনৰ বাবে প্ৰাৰ্থীসকলে মনোনয়ন জমা দিয়াৰ তাৰিখ ২৪ ডিচেম্বৰ, ২০১৮ৰ পৰা ৩ জানুৱাৰি ২০১৯লৈ। উক্ত দিনৰ ভিতৰত পুৱা ১১ বজাৰ পৰা আবেলি ৩বজালৈ মনোনয়নপত্ৰ দাখিল কৰিব পাৰিব।
মনোনয়ন পত্ৰ পৰীক্ষা কৰা হ’ব ৪ জানুৱাৰি, ২০১৯ তাৰিখে আৰু তাৰ ভিত্তিত উক্ত দিনাই বৈধ মনোনয়নৰ তালিকা প্ৰকাশ কৰা হ’ব।
আনহাতে প্ৰাৰ্থীসকলে ৭ জানুৱাৰি, ২০১৯ৰ পুৱা ১১বজাৰ পৰা ৩ বজালৈকে মনোনয়ন প্ৰত্যাহাৰৰ কৰিব পাৰিব।ইয়াৰ পিছতে চূড়ান্ত প্ৰাৰ্থীৰ তালিকা প্ৰকাশ কৰা হ’ব।
কোনো পৰিস্থিতিত পুনৰ ভোটগ্ৰহণ কৰিব লগীয়া হ’লে তাৰ বাবে ২১ জানুৱাৰি, ২০১৯ তাৰিখটো নিৰ্ধাৰণ কৰা হৈছে।
ভোট গণনা হ’ব ২২ জানুৱাৰি, ২০১৯ তাৰিখে পুৱা ৮ বজাৰ পৰা।
মিচিং, সোণোৱাল কছাৰী আৰু ৰাভা-হাছং স্বায়ত্তশাসিত পৰিষদৰো নিৰ্বাচন
গুৱাহাটীৰ প্ৰতিবেদকৰ সংযোজন : আনহাতে উত্তৰ কাছাৰ স্বায়ত্তশাসিত পৰিষদৰ লগতে মিচিং স্বায়ত্তশাসিত পৰিষদ, সোণোৱাল কছাৰী স্বায়ত্তশাসিত পৰিষদ আৰু ৰাভা-হাছং স্বায়ত্তশাসিত পৰিষদৰ নিৰ্বাচনো পাতিবলৈ ৰাজ্য চৰকাৰ আগ বঢ়া বুলি জানিব পৰা গৈছে।
উল্লেখযোগ্য যে উত্তৰ কাছাৰ স্বায়ত্তশাসিত পৰিষদৰ কাৰ্য্যকাল কেতিয়াবাই ওকলি গৈছিল। চৰকাৰৰ অনুৰোধত ন্যায়ালয়ে পৰিষদখনৰ কাৰ্য্যকাল ছমাহলৈ বৃদ্ধি কৰিছিল যদিও সেই কাৰ্য্যকালৰো ইতিমধ্যে অন্ত পৰিছে। ফলত অহা ৩০ জানুৱাৰিৰ ভিতৰত নিৰ্বাচন পাতিবলৈ ন্যায়ালয়ে নিৰ্দেশ দি থৈছে। একেদৰে মিচিং স্বায়ত্তশাসিত পৰিষদ, সোণোৱাল কছাৰী স্বায়ত্তশাসিত পৰিষদ আৰু ৰাভা-হাছং স্বায়ত্তশাসিত পৰিষদৰো কাৰ্য্যাকাল অন্ত পৰিব হৈছে।
