কাৰ্বি আংলং জিলাৰ সীমান্তৱৰ্তী বোকাখাতৰ টিপুজান চাহ বাগিচাৰ নলাত আজি বিয়লি এটা নাহৰফুটুকী বাঘৰ মৃতদেহ উদ্ধাৰ হোৱাৰ ঘটনাই অঞ্চলটোত চাঞ্চল্যৰ সৃষ্টি কৰিছে। বাগিচাৰ শ্ৰমিকে মতদেহটো প্ৰতক্ষ কৰি বন বিভাগক খবৰ দিয়াত ঘটনাটো পোহৰলৈ আহে।
প্ৰাপ্ত তথ্য মতে, বাগিচাখনৰ ৮ নং বাগিচাত বিয়লি ৪ মান বজাত পাত তুলি থকা মহিলা শ্ৰমিকে এডাল বাহঁত বান্ধি ওলমাই আনি অতি সযতনে বাগিচাৰ মাজৰ নলাত সুমোৱাই গছ-বন দি লুকুৱাই থোৱা গোন্ধ ওলাই থকা বাঘৰ মৃতদেহটো প্ৰত্যক্ষ কৰি চৰ্দাৰক খবৰ দিয়ে।
ইয়াৰ পিছত শ্ৰমিকে ঘটনা সন্দৰ্ভত পূব অসম বন্যপ্ৰাণী সংমণ্ডলৰ খণ্ড বন কাৰ্যালয়ক জনোৱাত বনকৰ্মী গৈ বাগিচাৰ নলাৰ পৰা নাহৰফুটুকী বাঘৰ উৱলিবলৈ ধৰা মৃতদেহটো উদ্ধাৰ কৰে।
স্থানীয় লোকৰ মতে কোনো দুস্কৃতিকাৰীয়ে বাঘটোক হত্যা কৰি বাঁহেৰে কঢ়িয়াই আনি বাগিচাৰ নলাত লুকুৱাই ৰাখিছিল। উদ্ধাৰ হোৱা নাহৰফুটুকী বাঘটোৰ মৃতদেহ উৱলি যোৱালৈ চাই বাঘটো তিনি চাৰি দিনতেই হত্যা কৰা বুলি বন বিভাগে সন্দেহ কৰিছে।
মৃত বাঘটো পিছত মৰণোত্তৰ পৰীক্ষাৰ বাবে প্ৰেৰণৰ কাৰণে কাজিৰঙাৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰলৈ পঠিওৱা হয়। মৰণোত্তৰ পৰীক্ষাৰ পিছতহে নাহৰফুটুকীৰ হত্যাৰ ৰহস্য কিছু পোহৰলৈ আহিব। ঘটনা সন্দৰ্ভত অধিক তথ্যৰ বাবে বোকাখাতৰ খণ্ড বন কাৰ্যালয়ে অনুসন্ধান আৰম্ভ কৰিছে।
