সমগ্ৰ দেশতে এতিয়া দ্বিতীয় পৰ্যায়ৰ লকডাউন চলি আছে। প্ৰধান মন্ত্ৰী মোদীয়ে দেশৰ জনসাধাৰণক কঠোৰভাৱে লকডাউন পালন কৰাৰ আহ্বানো জনাইছে।
কিন্তু ইয়াৰ পাছতো একাংশ লোকে এই লকডাউন উলংঘা কৰি অবাধে মিলিত হৈছে। সামাজিক দূৰত্ব বজাই ৰখাৰ নিয়ম উলাই কৰি বিপদ বৃদ্ধি কৰিছে।
বৃহস্পতিবাৰে কৰ্ণাটকৰ কালবুৰ্গি অঞ্চলৰ সিদ্ধলিংগেশ্বৰ মন্দিৰত আয়োজন কৰা এক মেলাত সহস্ৰাধিক লোকে ভিৰ কৰে।
অৱশ্যে, বহু পাছত হ’লেও প্ৰশাসনে ইয়াৰ বিৰুদ্ধে পদক্ষেপ গ্ৰহণ কৰিছে।
আৰক্ষীয়ে লকডাউন ভংগ কৰাৰ অভিযোগত ধাৰা ১৮৮,১৪৩ আৰু ২৬৯ৰ অধীনত গোচৰ ৰুজু কৰিছে।
প্ৰশাসনে জানিবলৈ দিয়া মতে, মন্দিৰ কমিটিয়ে পূৰ্বে এই মেলা অনুষ্ঠিত নহয় বুলি জনাইছিল। কিন্তু তাৰ পাছতো নিয়ম উংলঘা কৰি সেয়া অনুষ্ঠিত কৰে।
একেদৰে তামিলনাডুৰ মাদুৰাইতো ঘটিছে এনেদৰে লকাডাউন ভংগৰ আন এক ঘটনা। লকডাউনৰ প্ৰতি ভ্ৰূক্ষেপ নকৰি এটা জালিকাট্টুৰ ষাঁড়ৰ শেষকৃত্যত বহু লোকে অংশ লয়।
কৰ’না ভাইৰাছৰ শৃংখল ছিঙাৰ বাবে তথা সংক্ৰমণ ৰোধৰ বাবে প্ৰয়োজনীয় সামাজিক দূৰত্ব বজাই ৰখাৰ নিয়ম উংলঘা কৰা হয়।
জিলাখনৰ মাদুভাৰাতি গাঁৱৰ এই ঘটনা পোহৰলৈ অহাৰ পাছত প্ৰশাসন কঠোৰ হৈ পৰে। অনুষ্ঠানটোত ভাগ লোৱা লোকসকলৰ বিৰুদ্ধে এজাহাৰ দাখিল কৰা হয়।
ইপিনে, ভাৰতত কৰ’না আক্ৰান্তৰ সংখ্যা ১২,৭৫৯জনলৈ বৃদ্ধি পাইছে। বৃহস্পতিবাৰে স্বাস্থ্য মন্ত্ৰ্যালয়ে দিয়া পৰিসংখ্যা অনুসৰি, দেশত মুঠ আক্ৰান্তৰ ভিতৰত ১০,৮২৮জনৰ চিকিৎসা চলি আছে।
এই মাৰাত্মক ভাইৰাছৰ ফলত এতিয়ালৈকে ৪২০জন লোকৰ মৃত্যু হৈছে আৰু ১,৫১৪জন ৰোগী সুস্থ হৈ উঠিছে।
