ইচ্ছুক ব্যক্তিয়ে বিদেশলৈ গৈ ভেকচিন গ্ৰহণ কৰিব পাৰিব।
লগতে দুয়ো পালি টিকাৰ মাজৰ সময়ৰ ব্যৱধানত দেশখন ভ্ৰমণো কৰিব পৰা যাব।
এনে এক অভিনৱ প্ৰস্তাৱ আগবঢ়াইছে দিল্লীৰ এটা পৰ্যটন সংস্থাই।
ইতিমধ্যে ৰাছিয়াত নিৰ্মিত কোভিড ভেকচিন স্পুটনিক ভি-ৰ ব্যৱহাৰ ভাৰতত আৰম্ভ হৈছে।
ভেকচিনবিধৰ প্ৰতি মানুহৰ উৎসাহো পৰিলক্ষিত হৈছে।
ভাৰতীয়ৰ মাজত স্পুটনিক-ভিৰ এই চাহিদাৰ প্ৰতি লক্ষ্য ৰাখি দিল্লীৰ এটা পৰ্যটন সংস্থাই এটা পেকেজ ট্যুৰৰ সুযোগ আনি দিছে।
সেই অনুসৰি আগ্ৰহী লোকক ৰাছিয়াৰ মস্কোলৈ লৈ যোৱা হ’ব।
২৪ দিনীয়া এই ভ্ৰমণকালত ভেকচিনৰ লগতে পৰ্যটনৰো ব্যৱস্থা ৰখা হৈছে।
ইয়াৰ বাবে একোজন লোকে খৰচ কৰিব লাগিব ১ লাখ ৩০ হাজাৰ টকা।
পৰ্যটন সংস্থাটোৱে জনোৱামতে, মস্কোত গৈ পোৱাৰ পাছৰ দিনটোতে ভেকচিনৰ ব্যৱস্থা কৰা হ’ব।
ইতিমধ্যে ১৫ মে’ত ৩০ জনীয়া এটি দলক মস্কোলৈ লৈ যোৱা হৈছে।
ইয়াৰ বেছিভাগেই গুৰুগ্ৰামৰ চিকিৎসক।
পৰ্যটন সংস্থাটোৱে জনোৱামতে, দলটোৰ ভেকচিন প্ৰদান হৈ গৈছে।
২৯ মে’ তাৰিখে আন এটা দলক পঠিওৱাৰ ব্যৱস্থা কৰা হৈছে।
এই দলটোত আছে দিল্লীৰ কেইবাজনো চিকিৎসক।
পৰ্যটন সংস্থাটোৱে জনোৱামতে, প্ৰথম তিনি দিন চেইণ্ট পিটাৰ্ছবাৰ্গত থাকিব দলটো।
বাকী দিনসমূহ মস্কোতে কটোৱাৰ ব্যৱস্থা কৰা হৈছে।
এইক্ষেত্ৰত যাত্ৰীসকলৰ কেৱল আৰপিটিচিআৰ নিগেটিভ ৰিপ’ৰ্ট থাকিলেই হ’ব।
আপোনাৰো যদি মন আছে, তেনেহ’লে বুকিং কৰি লওক এই সুযোগৰ!
