দেশৰ ৰাজধানীত দিন-দূপৰতে অন কেমেৰা সংঘটিত হৈছে এক নৃশংস হত্যাকাণ্ড। মাত্ৰ ৩ হাজাৰ টকাক কেন্দ্ৰ কৰি হোৱা বিবাদৰ পৰিণতিত হত্যাৰ বলি হৈছে এগৰাকী যুৱক। দক্ষিণ দিল্লীৰ তিগ্ৰী অঞ্চলত এই হত্যাকাণ্ড সংঘটিত হৈছে।
ছ’চিয়েল মিডিয়া প্লেটফৰ্মত এই নৃশংস ঘটনাৰ এটা ভিডিঅ’ পোহৰলৈ আহিছে। ভিডিঅ’টোত এগৰাকী যুৱকে এখন দোকানৰ বাহিৰত বাৰে বাৰে আন এগৰাকী যুৱকক ছুৰীৰে আঘাত কৰা দেখা পোৱা গৈছে।
নিহত যুৱকগৰাকীক ইউছুফ বুলি চিনাক্ত কৰা হৈছে। আনহাতে হত্যাত অভিযুক্ত যুৱকগৰাকীৰ নাম শ্বাহৰুখ বুলি জানিব পৰা গৈছে। ছুৰিকাঘাতত গুৰুতৰভাৱে আহত ততাতৈয়াকৈ ইউছুফক এখন চিকিৎসালয়লৈ লৈ যোৱা হয় যদিও চিকিৎসকে তেওঁক মৃত ঘোষণা কৰে।
ইউছুফৰ পিতৃ চাহিদ আলীয়ে আৰক্ষীক জনোৱা মতে, তিনি-চাৰি দিন পূৰ্বে তেওঁৰ পুত্ৰক শ্বাহৰুখ নামৰ যুৱকগৰাকীয়ে আৰ্থিক বিষয়ক লৈ ভাবুকি দি আহিছিল।
তেওঁৰ ভাষ্য মতে, ইউছুফে শ্বাহৰুখৰ পৰা ৩ হাজাৰ টকাৰ ঋণ লৈছিল আৰু এই ধনৰাশি ঘূৰাই দিবলৈ সঘনে ভাবুকি দি আহিছিল শ্বাহৰুখে। এই ধনৰ বাবেই ইউছুফক হত্যা কৰা বুলি তেওঁ লগতে দাবী কৰে।
ইফালে ইউছুফক এইদৰে ছুৰীৰে আঘাত কৰাৰ পিছতে ঘটনাস্থলীত উপস্থিত থকা স্থানীয় লোকসকলে অভিযুক্ত শ্বাহৰুখক প্ৰহাৰ কৰে। গণপ্ৰহাৰত আহত শ্বাহৰুখকো চিকিৎসালয়ত ভৰ্তি কৰোৱা হয়।
ঘটনা সন্দৰ্ভত হত্যাৰ বলি হোৱা ইউছুফৰ পিতৃৰ অভিযোগৰ ভিত্তিত গোচৰ ৰুজু কৰা হ’ব বুলি স্থানীয় এগৰাকী আৰক্ষী বিষয়াই সদৰী কৰে।
