প্ৰচণ্ড গৰমৰ বাবে কামৰূপ(মেট্ৰো)জিলাত দুদিনৰ বাবে সকলো চৰকাৰী-বেচৰকাৰী বিদ্যালয় বন্ধ ৰখাৰ নিৰ্দেশ
ৰাজ্যত অব্যাহত থকা প্ৰচণ্ড গ্ৰীষ্ম প্ৰবাহৰ বাবে কামৰূপ (মেট্ৰো) জিলাৰ সকলো চৰকাৰী আৰু ব্যক্তিগত খণ্ডৰ বিদ্যালয় ২৭ আগষ্ট আৰু ২৮ আগষ্টত দুদিনৰ বাবে বন্ধ থাকিব।
কামৰূপ (মেট্ৰো) জিলাৰ উপায়ুক্তই সোমবাৰে এখন জাননী জাৰি কৰি জিলাখনৰ সকলো বিদ্যালয়ক উক্ত দুয়োটা দিনতে বিদ্যালয়সমূহ বন্ধ ৰখাৰ বাবে নিৰ্দেশ দিছে।
উল্লেখযোগ্য যে, ৰাজ্যত প্ৰচণ্ড গৰমৰ বাবে স্কুলীয়া ছাত্ৰ-ছাত্ৰীসকলে অসুবিধা ভোগ কৰিবলগীয়া পৰিস্থিতিৰ উদ্ভৱ হৈছে।
গৰমৰ বাবে যাতে কোনো বিদ্যালয়ত ছাত্ৰ-ছাত্ৰী অসুস্থ হৈ পৰিবলগীয়া পৰিস্থিতিৰ সৃষ্টি নহয় তাৰপ্ৰতি লক্ষ্যৰাখি মহানগৰ প্ৰশাসনে এনেধৰণৰ নিৰ্দেশ দিছে।
বৰিবাৰ আৰু সোমবাৰৰ দিনটোত গুৱাহাটী মহানগৰীৰ সৰ্বোচ্চ্ আৰু সৰ্বনিম্ন তাপমাত্ৰা আছিল ক্ৰমে ৩৭ ডিগ্ৰী, ২৭ ডিগ্ৰী আৰু ৩৬ ডিগ্ৰী, ২৬ ডিগ্ৰী।
ৰাজ্যৰ উৰ্ধগামী পাৰাস্তম্ভৰ বাবে আগষ্ট মাহৰ শেষৰ ভাগত এনেদৰে বিদ্যালয় বন্ধ দিবলগীয়া ঘটনাই জলবায়ু পৰিবৰ্তনৰ নিৰ্মোহ বাস্তৱ ছবিখন পুনৰবাৰ উদঙাই দিছে।
যিবোৰ বিদ্যালয়ৰ বন্ধ ঘোষণা কৰা দুয়োটা দিনত পৰীক্ষা অনুষ্ঠিত হ’বলগীয়া আছে সেইবোৰ বিদ্যালয়ৰ পৰীক্ষা সূচী সম্পৰ্কত কোনোধৰণৰ নিৰ্দেশনা জাননিটোত দিয়া হোৱা নায়।