অসমৰ ধুবুৰী আৰু বৰপেটা অঞ্চলত বাংলাদেশৰ সন্ত্ৰাসবাদী সংগঠন জামাতুল মুজাহিদিন বা জেএমবিৰ এটা গোটৰ উপস্থিতি সম্পৰ্কে ভাৰতক বাংলাদেশৰ চোৰাংচোৱাই সকীয়াই দিছে। জেএমবিৰ এজন শীৰ্ষ কমাণ্ডাৰ ছালাহুদ্দিন ছালেহিনে প্ৰায় পোন্ধৰজন সন্ত্ৰাসবাদী সদস্যক লৈ এই অঞ্চলত শিবিৰ পাতিছে বুলি বাংলাদেশ চোৰাংচোৱাৰ শীৰ্ষ বিষয়াই জানিবলৈ দিছে।
তেওঁ কয় যে ভাৰতীয় চোৰাংচোৱাক জনোৱা হৈছে। ‘’ আমি তেওঁলোকৰ সঠিক অৱস্থিতি নাজানো আৰু তেওঁলোকে ইঠাইৰ পৰা সিঠাইলৈ যাব পাৰে। কিন্তু বাংলাদেশলৈ উভতি অহা তেওঁলোকৰ আন সদস্যলৈ কৰা ফোন ধৰা পেলাই পশ্চিম অসমৰ এই অঞ্চলৰ কথা জানিব পৰা গৈছে,’’- নিজৰ গোপনীয়তা ৰক্ষাৰ চৰ্তত বিষয়াগৰাকীয়ে ‘নৰ্থইষ্ট নাও’ৰ আগত এইদৰে কয়।
তেওঁ জানিব দিয়ে যে জেএমবি সদস্যৰ দ্বাৰা গঠিত এই জেএমবিৰ গোটটোৱে কিছুদিন ধৰি ভাৰতত লুকাই আছে।
তেওঁলোকে বেছিভাগ সময় দক্ষিণ ভাৰত আৰু পশ্চিমবংগত লুকাই আছিল যদিও এই ৰাজ্যসমূহত শেহতীয়াভাৱে চলোৱা তালাচী অভিযানৰ লগতে ইয়াৰ শীৰ্ষ বিস্ফোৰণ বিশেষজ্ঞ জাহিদুল ইছলাম ওৰফে বোমা মিজানকে ধৰি কিছু জেএমবি সদস্য গ্ৰেপ্তাৰ হোৱাৰ পাছত তেওঁলোকে অসমলৈ গতি কৰিছে। মিজানক বাংগালোৰত গ্ৰেপ্তাৰ কৰা হৈছিল।
চোৰাংচোৱা বিষয়াগৰাকীয়ে জানিবলৈ দিয়ে যে অসমত আত্মগোপন কৰি থকা এই গোটটোৱে অহা ৩০ ডিচেম্বৰত অনুষ্ঠিত হ’বলগীয়া সাধাৰণ নিৰ্বাচনৰ আগেয়ে কূটাঘাত সংঘটিত কৰাৰ বাবে বাংলাদেশত প্ৰৱেশ কৰিব পাৰে। ছালেহিন আৰু মিজানে ২০১৩ চনত এখন কাৰাগাৰৰ পৰা মৈমনসিঙৰ তেইশালৰ আদালতলৈ লৈ যোৱাৰ সময়ত বাংলাদেশৰ পৰা পলায়ন কৰাৰ পৰাই অধিকাংশ সময় ভাৰততে আত্মগোপন কৰি আছে।
দুবছৰ আগতে ঢাকাৰ এখন ৰেষ্টোৰাত সন্ত্ৰাসবাদীৰ আক্ৰমণৰ ফলত বহুকেইজন বিদেশী আৰু স্থানীয় লোক নিহত হোৱা ঘটনাৰ পাছত সংগঠনটোৰ বিৰুদ্ধে ৰাষ্ট্ৰজুৰি চলা ব্যাপক অভিযানৰ পৰাই বাংলাদেশত জেএমবিৰ কৰ্মীসকল গভীৰ চাপত আছে।
