ক’ৰ’নাৰ আতংকৰ বাবে ধিং এক্সপ্ৰেছ হিমা দাসে সলালে নিজৰ ট্ৰেক
এতিয়া সমগ্ৰ বিশ্বজুৰি কাল ৰূপ ধাৰণ কৰিছে মহামাৰী কৰ’ণা বা কভিড-১৯ ভাইৰাছে। ভাৰততো এই ভাইৰাছৰ কবলত বৰ্তমানলৈকে ৬ শতাধিক লোক আক্ৰান্ত হোৱাৰ লগতে ১৪ গৰাকীয়ে ইতিমধ্যে মৃত্যুক সাবটি লৈছে।
সেয়েহে সমগ্ৰ ভাৰততে সম্পূৰ্ণ ২১ দিন অৰ্থ্যাৎ যোৱা ২৪ মাৰ্চৰ নিশা ১২ বজাৰ পৰা অহা ১৪ এপ্ৰিললৈকে লকডাউন ঘোষণা কৰিছে প্ৰধান মন্ত্ৰী নৰেন্দ্ৰ মোদীয়ে।
মোদীয়ে সকলোকে এই ২১ দিন ঘৰৰ ভিতৰত নিজকে আৱদ্ধ কৰি ৰাখিবলৈ আহ্বান জনাইছে। মোদীৰ এই আহ্বানৰ প্ৰতি সঁহাৰি জনাই নিজৰ ট্ৰেক সলালে অসম কন্যা ধিং এক্সপ্ৰেছ খ্যাত হিমা দাসে।
Enjoy this video of young talent @HimaDas8 Stay Home Stay Safe #StaySafe pic.twitter.com/fb9GCbZQuz
— Rahul Trehan (@imrahultrehan) March 26, 2020
হিমা দাসে ঘৰৰ ভিতৰত থাকি সংগীত চৰ্চা কৰি থকা এটা ভিডিঅ’ ইতিমধ্যে ছ’চিয়েল মিডিয়াত ভাইৰেল হৈ পৰিছে। বাদ্যযন্ত্ৰৰ তালে তালে হিমাৰ কন্ঠৰে নিগৰিত হৈছে জুবিন গাৰ্গৰ জনপ্ৰিয় শিশু এলবামৰ ‘কাৰ পৰশ কাৰ সুৱাস’ শীৰ্ষক গীতটি। হিমাৰ সৈতে সহযোগ কৰিছে ৰাহুল ট্ৰেহানে।
ট্ৰেহানে নিজৰ টুইটাৰ একাউন্টৰ জৰিয়তে গীতটো আপলোড কৰিছে আৰু লিখিছে ‘যুৱ প্ৰতিভা হিমাৰ এই ভিডিঅ’টো উপভোগ কৰক, ঘৰতে থাকক আৰু সুৰক্ষিত থাকক।‘
ইপিনে, হিমাই ছবি অকাও পৰিলক্ষিত হ’ল। কিছু সময় পূৰ্বে নিজৰ ফেইচবুক পেইজৰ পৰা এটা ভিডিঅ’ আপলোড কৰিছিল হিমাই, য’ত হাতত পেঞ্চিল লৈ চিত্ৰ অংকন কৰাত ব্যস্ত হিমা।
চিত্ৰ অংকন কৰি থকাৰ সময়তে হিমাই দেশবাসীলৈ আহ্বান জনাই কয়, ‘যিহেতু লকডাউন চলি আছে, গতিকে আপোনালোক পৰিয়ালৰ সৈতে ঘৰৰ ভিতৰতে থাকক। ময়ো সেই নিয়মকে পালন কৰি আছো আৰু আপোনালোকেও পালন কৰক। মই সময় অতিবাহিত কৰিবলৈ ছবি আঁকিছো। সকলো চাফা হৈ থাকক, সুখী থাকক।‘