দ্ৰাগছ ব্যৱসায়ীৰ সৈতে সম্পৰ্ক ৰক্ষাৰ অভিযোগত কিছুদিন পূৰ্বে ধুবুৰীৰ সীমান্ত শাখাৰ উপ-আৰক্ষী অধীক্ষক যতীন চন্দ্ৰ দাসক গ্ৰেপ্তাৰ কৰাৰ পিছত দুৰ্নীতিৰ অভিযোগত পুনৰ ধুবুৰীত গ্ৰেপ্তাৰ কৰা হয় আন এগৰাকী শীৰ্ষ বিষয়াক।
ধুবুৰীৰ পৰিবহন বিভাগৰ কাৰ্যালয়ৰ সহকাৰী এনফোৰ্চমেণ্ট বিষয়া আৰিফুল ইছলামক চিআইডিয়ে দুৰ্নীতিৰ অভিযোগত গ্ৰেপ্তাৰ কৰে।
ধৃত ইছলাম ধুবুৰীৰ পৰিবহন বিভাগৰ কাৰ্যালয়ত সহকাৰী এনফোৰ্চমেণ্ট বিষয়া হিচাবে কৰ্মৰত আছিল।
এক বিশেষ সূত্ৰই প্ৰকাশ কৰা তথ্য অনুসৰি দুৰ্নীতিৰ অভিযোগ উত্থাপন হোৱাৰ পিছতে চিআইডিয়ে ইছলামক সোধা-পোছাৰ বাবে মাতি পঠিয়াইছিল।
বহু সময় ধৰি সোধা-পোছা কৰাৰ অন্তত ইছলামক চিআইডিয়ে গ্ৰেপ্তাৰ কৰে।তেওঁক পিছত গুৱাহাটীৰ আদালতত হাজিৰ কৰোৱা হয় আৰু আদালতে তেঁওক ন্যায়িক জিম্মালৈ প্ৰেৰণ কৰে।
গ্ৰেপ্তাৰ হোৱা বিষয়া জন উপ-আৰক্ষী অধীক্ষক যতীন দাস যিটো গোচৰত গ্ৰেপ্তাৰ হৈছে সেই গোচৰটোৰ সৈতেও জড়িত বুলি জানিব পৰা গৈছে।
ড্ৰাগছ মাফিয়া আৰু গৰুৰ চোৰাং সৰবৰাহকাৰীৰ সৈতে জড়িত থকাৰ অভিযোগত আৰক্ষীয়ে চলিত বৰ্ষৰ ৩১ মে’ৰ দিনা ধুবুৰীৰ সীমান্ত শাখাৰ উপ-আৰক্ষী অধীক্ষক যতীন চন্দ্ৰ দাসক গ্ৰেপ্তাৰ কৰিছিল।
দাসৰ পৰা আৰক্ষীয়ে নগদ ৪.৭৭ লাখ টকাও জব্দ কৰিছিল।
এক বিশেষ সূত্ৰই প্ৰকাশ কৰা অনুসৰি শেহতীয়াকৈ গ্ৰেপ্তাৰ হোৱা পৰিবহন বিভাগৰ সহকাৰী এনফোৰ্চমেণ্ট বিষয়া ইছলামে মুখ্যমন্ত্ৰীৰ সাহায্য পুঁজিলৈ নিজৰ এমাহৰ দৰমহা দান কৰিছিল আৰু চিকিৎসা জনিত কাৰণত তেওঁ যোৱা কিছুদিন ধৰি গুৱাহাটীতে আছিল।
