কৰোনাতংকৰ মাজতে ডিব্ৰুগড়ত বৃহৎ পৰিমাণৰ অবৈধ সুৰা জব্দ : এগৰাকীক গ্ৰেপ্তাৰ আৰক্ষীৰ
সমগ্ৰ ৰাজ্যতে কোভিড বিধি কঠোৰভাৱে বলৱৎ হৈ থকাৰ মাজতে বুধবাৰে ডিব্ৰুগড় আৰক্ষীয়ে ডিব্ৰুগড় নগৰত বৃহৎ পৰিমাণৰ অবৈধ সুৰা জব্দ কৰাৰ লগতে সুৰা ভাটিও উৎখাত কৰিছে।
এক গোপন খবৰৰ ভিত্তিত ডিব্ৰুগড় আৰক্ষী অধীক্ষক শ্বেতাঙ্ক মিশ্ৰৰ নেতৃত্বত যোৱা আৰক্ষীৰ এটা দলে ডিব্ৰুগড় নগৰৰ গ্ৰাহামবজাৰৰ এলেকাত অভিযান চলাই অভিষেক কুমাৰ শ্বাহ নামৰ এজন লোকৰ বাসগৃহৰ পৰা বৃহৎ পৰিমাণৰ বীয়েৰ বটলৰ সৈতে অবৈধ সুৰাৰ জব্দ কৰে।
অভিযানকাৰী আৰক্ষী দলটোৱে শ্বাহৰ বাসগৃহত থকা সুৰাভাটি এটাও উৎখাত কৰাৰ লগতে শ্বাহক গ্ৰেপ্তাৰো কৰিছে।
“আমি অবৈধ সুৰাৰ বিৰুদ্ধে অভিযান চলাই বৃহৎ পৰিমাণৰ অবৈধ সুৰা জব্দ কৰাৰ লগতে এজন লোকক গ্ৰেপ্তাৰ কৰি ন্যায়িক জিম্মালৈ প্ৰেৰণ কৰিছো।” আৰক্ষী সূত্ৰই সংবাদ মাধ্যমৰ আগত কয়।
আৰক্ষী সূত্ৰটোৰ মতে ডিব্ৰুগড় চহৰৰ বহু অঞ্চলত অবৈধ সুৰাৰ ব্যৱসায় বৃদ্ধি পাইছে আৰু কিছুমান ব্যক্তিয়ে তেওঁলোকৰ বাসগৃহত বৃহৎ পৰিমাণৰ সুৰা মজুত ৰখা দেখা গৈছে।
লকডাউনৰ সময়ৰে পৰাই ডিব্ৰুগড়ত দেশীয় সুৰা সহজলভ্য হৈ আহিছে। চহৰখনৰ বিভিন্ন স্থানত দেশীয় সুৰাৰ উৎপাদন কৰাৰ লগতে মজুত কৰি ৰখাৰ খবৰ আৰক্ষীয়ে লাভ কৰিছে আৰু সেই স্থানসমূহতো আৰক্ষীয়ে অভিযান চলাব বুলি জানিব পৰা গৈছে।