কমলপুৰত সত্যব্ৰত কলিতাক ক্ষমা খুজি তৎ পোৱা নাই বিজেপি প্ৰাৰ্থী দিগন্ত কলিতাই, কিন্তু কিয়?
কমলপুৰত এতিয়া চলিছে ক্ষমা খোজাৰ ৰাজনীতি।
ক্ষমা খোজাৰ ক্ষেত্ৰত পিছ পৰা নহয় এইবাৰ কমলপুৰ সমষ্টিত বিজেপিৰ টিকট লাভ কৰা দিগন্ত কলিতাও।
সৌসিদিনালৈ সমষ্টিটোৰ বৰ্তমানৰ অগপ বিধায়ক সত্যব্ৰত কলিতাক কুকুৰে কাঁইট নোখোৱাকৈ গালি পাৰি থকা দিগন্ত কলিতাৰ মনত শেহতীয়াকৈ ‘অনুশোচনা’ হৈছে।
অগপই এইবাৰ কমলপুৰ সমষ্টিত সত্যব্ৰত কলিতাক টিকটৰ পৰা বঞ্চিত কৰি বিজেপিৰ প্ৰাৰ্থীৰ বাবে সমষ্টিটো এৰি দিয়াৰ পিছতে অগপ ত্যাগ কৰাৰ কথা ঘোষণা কৰিছিল সত্যব্ৰতে।
ইয়াৰ পিছতে তেওঁ কংগ্ৰেছমুখী হ’ব বুলিও চৰ্চা হৈছিল। সত্যব্ৰত কলিতাই কংগ্ৰেছত যোগদান কৰি কমলপুৰ সমষ্টিৰ পৰা কংগ্ৰেছ প্ৰাৰ্থী হিচাবে নিৰ্বাচনত অংশ ল’ব বুলি কথা ওলোৱাৰ পিছতে শংকিত হৈ পৰিছিল হিমন্ত বিশ্ব শৰ্মাৰ অতি ঘনিষ্ঠ বুলি পৰিচিত বিজেপি প্ৰাৰ্থী দিগন্ত কলিতা।
দিকবিদিক হেৰুৱাই পেলাই দিগন্ত কলিতাই কংগ্ৰেছৰ সাম্ভাব্য প্ৰাৰ্থী হিচাবে চৰ্চিত হোৱা সত্যব্ৰত কলিতাক অতি বেয়াকৈ সমালোচনা কৰিছিল। ইয়াৰ মাজতে কংগ্ৰেছে কমলপুৰ সমষ্টিত কিশোৰ কুমাৰ ভট্টাচাৰ্যক টিকট প্ৰদানৰ পিছতে ভুল ভাগিল দিগন্ত কলিতাৰ।
সেইবাবেই ইমান দিনে সত্যব্ৰত কলিতাক পাৰি অহা গালিৰ বাবে তেওঁ আজি অনুতপ্ত। সত্যব্ৰত কলিতাক লগতলৈ সেয়ে দিগন্তই সংবাদমাধ্যমৰ আগত ক’লে যে তেওঁ যি কৈছিল তাৰ বাবে তেওঁ ক্ষমা প্ৰাৰ্থী।
সত্যব্ৰত কলিতাৰ সৈতে ককায়েক-ভায়েকৰ সম্পৰ্ক থকা বুলি উল্লেখ কৰি দিগন্ত কলিতাই সত্যব্ৰতৰ ওচৰত ক্ষমা প্ৰাৰ্থনা বিচাৰে। দিগন্ত কলিতাই লগতে কয় যে দাদা অৰ্থাৎ হিমন্ত বিশ্ব শৰ্মাৰ সৈতেও তেওঁ বিষয়টো আলোচনা কৰিছে আৰু দাদায়ো তেওঁক সত্যব্ৰতক প্ৰয়োজন হ’লে ভৰিত ধৰি ক্ষমা খোজাৰ পৰামৰ্শ দিছে।
উল্লেখ্য সত্যব্ৰত কলিতাৰ সহযোগিতা অবিহনে হিমন্ত বিশ্ব শৰ্মাৰ আশীৰ্বাদ থাকিলেও কমলপুৰ সমষ্টিত দিগন্ত কলিতাৰ বাবে বিজয় সাৱস্ত্য কৰাটো সহজ কথা নহ’ব।
সেয়া উপলব্ধি কৰিয়েই দিগন্ত কলিতাৰ মনত ক্ষমা খোজাৰ প্ৰৱণতা তীব্ৰতৰ হৈ পৰা বুলি বিভিন্ন মহলত আলোচনা হৈছে।