চোৰাং চিকাৰৰ ঘটনাত সন্ধানহীন ১.৮ কেজি ওজনৰ হাতীৰ দাঁত উদ্ধাৰ ডিগবৈ বন বিভাগৰ
তিনিচুকীয়া জিলাৰ ডিগবৈৰ লক্ষীপথাৰত সোমবাৰে পুৱা ১.৮ কিলোগ্ৰাম ওজনৰ ১.৬ ফুট দৈৰ্ঘ্যৰ হেৰুৱা হাতীৰ দাঁত এটা উদ্ধাৰ কৰি ডিগবৈ বন সংমণ্ডলে এক বৃহৎ সাফল্য লাভ কৰিছে।
১৯ দিন ধৰি ব্যাপক তালাচী অভিযানত নিয়োজিত বিষয়াসকলৰ মতে, চোৰাং ব্যৱসায়ৰ উদ্দেশ্যেৰে ৰখা বুলি সন্দেহ কৰা দাঁতটো ইতিমধ্যে গ্ৰেপ্তাৰ হোৱা অভিযুক্ত উজনি মামৰাণী গাঁৱৰ নিতুল মৰাণৰ বাসগৃহৰ পৰা উদ্ধাৰ কৰা হৈছে।
যোৱা ৩০ মে’ত এখন চাহ বাগিচাত বিদ্যুৎস্পৃষ্ট কৰি এটা পূৰ্ণবয়স্ক বন্যহস্তীৰ চোৰাং চিকাৰৰ ঘটনা পোহৰলৈ আহিছিল।
বিশ্বাসযোগ্য প্ৰমাণ আৰু স্বীকাৰোক্তিৰ ভিত্তিত চাহ বাগিচাৰ মালিকক গ্ৰেপ্তাৰ কৰা হৈছিল।
কিন্তু প্ৰাৰম্ভিক জেৰাৰ সময়ত কটা হাতীৰ দাঁতটোৰ কোনো উল্লেখযোগ্য তথ্য লাভ কৰিব পৰা নাছিল, যাৰ ফলত চুৰি হোৱা বন্যপ্ৰাণীৰ সম্পত্তিৰ সন্ধান আৰু জব্দ কৰাৰ ক্ষেত্ৰত বন বিভাগৰ বাবে এক বৃহৎ প্ৰত্যাহ্বানৰ সৃষ্টি হৈছিল।
এনে প্ৰত্যাহ্বান গ্ৰহণ কৰি এই কাণ্ডৰ মাত্ৰ এসপ্তাহ পূৰ্বে দায়িত্ব গ্ৰহণ কৰা ডিগবৈৰ বন সংমণ্ডল বিষয়া (ডি এফ অ’) বি ভি সন্দীপে চুৰি হোৱা চৰকাৰী সম্পত্তি উদ্ধাৰ কৰি বন আইনৰ সংশ্লিষ্ট ধাৰা অনুসৰি চোৰাংচিকাৰীক আইনৰ আওতালৈ অনাৰ প্ৰতিশ্ৰুতি দিছিল।
ডি এফ অ’গৰাকীয়ে কয়, ‘মই আনন্দিত যে বন বিভাগৰ বিভিন্ন শাখাৰ অদম্য প্ৰচেষ্টাই অৱশেষত কেইবাটাও প্ৰত্যাহ্বানৰ মাজতো যথেষ্ট সাহসিকতা দেখুৱাই সুফল কঢ়িয়াই আনিছে।‘
শীৰ্ষ বিষয়াগৰাকীয়ে লগতে কয় যে সংমণ্ডলটোৰ এলেকাৰ ভিতৰত বন্যপ্ৰাণীৰ চোৰাং চিকাৰ বা কোনো বনবিৰোধী কাৰ্য্যকলাপৰ প্ৰতি কোনো সহনশীলতা গ্ৰহণযোগ্য নহ’ব।
উল্লেখযোগ্য যে হাতীটোৰ চোৰাং চিকাৰৰ পাছত চুৰি হোৱা হাতী দাঁতটো উদ্ধাৰ কৰাটো দশক ধৰি বিৰল কৃতিত্বৰ ভিতৰত অন্যতম বুলি গণ্য কৰা হৈছে আৰু ইয়াৰ কৃতিত্ব ডিগবৈ বন বিভাগৰ।
তদুপৰি, উল্লেখযোগ্য যে ইতিমধ্যে কৰ্তৃপক্ষই বন্যপ্ৰাণী সুৰক্ষা আইন, ১৯৭২ৰ ধাৰা ৯, ৩৯, ৪০, ৪৯বি, ৫১, আৰু ৫৫ৰ অধীনত অভিযুক্তসকলৰ বিৰুদ্ধে গোচৰ চলাইছে।