নগাঁও জিলাৰ চামগুৰি সমষ্টিৰ অন্তৰ্গত বৰজুৰি চিমনাবস্তিত অৱস্থিত শালনা আৰু বৰজুৰি সংযোগী পথৰ ওপৰত থকা এক মাত্ৰ কাঠৰ দলংখন আজি জৰজীৰ্ণ হৈ পৰাৰ উপক্ৰম হৈছে।এতিয়া ৰজাঘৰীয়া কাৰোৱেই খবৰ নাই। প্ৰতিটো নিৰ্ব্বাচন আহিলেই বৰমূৰীয়া সকলে সাৰ পাই উঠে আৰু তেতিয়াহে উক্ত দলংখন মেৰামতি কৰা পৰিলক্ষিত হয়।
প্ৰায় আধাখিনি বিধ্বস্ত হোৱা এই কাঠৰ দলংখনে আমনি-শালনা-বৰজুৰি – উদমাৰী-চামগুৰি পথক মূল পথৰ সৈতে সংযোগ স্থাপন কৰিছে। গতিকে বৃহত্তৰ অঞ্চলৰ দৰিদ্ৰ তথা চাহ অধ্যুষিত গঞালোকৰ লগতে স্কুল কলেজৰ ছাত্ৰ-ছাত্ৰী সকলে আজি যাতায়তৰ ক্ষেত্ৰত জলাকলা খাব লগা হৈছে।
বিভিন্ন সময়ত ৰাজনৈতিক নেতা সকল উপস্থিত হৈ এই কাঠৰ দলংখন পকীকৰণ কৰাৰ প্ৰতিশ্ৰুতি দি আহিছে যদিও কাৰ্যত আজি পৰ্যন্ত প্ৰতিশ্ৰুতি প্ৰতিশ্ৰুতিয়েই হৈ আছে।
বৰ্তমানৰ পৰিবৰ্তনকামী চৰকাৰক অতি সোনকালে কাঠৰ দলংখন মেৰামতি কৰি ছাত্ৰ-ছাত্ৰী তথা বৃহত্তৰ ৰাইজৰ বিপদ সংকুল যাত্ৰাৰ ওৰ পেলোৱাৰ লগতে দলংখন পকীকৰণৰ ব্যৱস্থা কৰিবলৈ ৰাইজে আহ্বান জনাইছে।
