ডিব্ৰুগড়ৰ এজন চিকিৎসকে সোমবাৰে ৰাতি মিলন নগৰৰ নিজ ঘৰত শুই থকা এটি নাবালকৰ গাত উতলা পানী ঢালি দিয়াৰ এক গুৰুতৰ অভিযোগ উত্থাপিত হৈছে।
শিশু কল্যাণ সমিতিয়ে ১২ বছৰীয়া শিশুটো উদ্ধাৰ কৰিছে আৰু ডিব্ৰুগড় আৰক্ষী থানাত এজাহাৰ দাখিল কৰিছে।
চিকিৎসক সিদ্ধি প্ৰসাদ দেউৰী আৰু তেওঁৰ পত্নী মিতালী কোঁৱৰৰ লগত যোৱা ডেৰ বছৰ ধৰি ১২ বছৰীয়া শিশুটোৱে ঘৰুৱা শ্ৰমিকৰূপে কাম কৰি আহিছে।
সংবাদ মাধ্যমৰ সৈতে হোৱা কথা-বাৰ্তাত শিশুটিয়ে কয় যে ঘৰৰ মজিয়াত ৰাতি শুই থাকোতে ডাঃ সিদ্ধি প্ৰসাদ দেউৰীয়ে গাত উতলা পানী ঢালি দিয়ে।
শিশুটিয়ে জনোৱা মতে তেওঁলোকৰ সকলো ঘৰুৱা কাম তেওঁ কৰি আহিছে।
শিশুটিয়ে লগতে জনাই যে তেওঁৰ ঘৰ যোৰহাটত, কিন্তু দেউতাকৰ লগত যোগাযোগ কৰিবলৈ তাক দিয়া নহয়।
শিশু কল্যাণ সমিতিৰ এজন সদস্যই জনোৱা মতে তেওঁলোকে শিশুটিৰ প্ৰকৃত ঘৰৰ ঠিকনা বিচৰাত চিকিৎসকজনে সেয়া জনোৱা নাছিল আৰু শিশুটি তেওঁলোকৰ সম্পৰ্কীয় আৰু দেউৰী উপাধিৰ বুলি কৈছিল।
কিন্তু পিছত পোহৰলৈ আহে যে শিশুটিৰ উপাধি ভূঞাহে।
ডাঃ দেউৰী ডিব্ৰুগড়ৰ অসম চিকিৎসা মহাবিদ্যালয় হস্পিটেলৰ চিকিৎসক আৰু পত্নী মিতালী কোঁৱৰ মৰাণ কলেজৰ অধ্যক্ষা।
ডিব্ৰুগড় আৰক্ষীয়ে সমিতিক ২৪ ঘণ্টাৰ ভিতৰত ঘটনা সন্দৰ্ভত ব্যৱস্থা লোৱাৰ আশ্বাস দিছে।
