গুৱাহাটী মহানগৰীত বিগত কিছুদিন পূৰ্বে অৰণ্যৰ পৰা ওলাই অহা গজৰাজে বিচৰণ কৰি জনসাধাৰণক আতংকিত কৰি তোলাৰ পাছতে এইবাৰ এটা বলিয়া কুকুৰৰ আক্ৰমণে ত্ৰাসৰ সৃষ্টি কৰে মহানগৰীৰ পানবজাৰ আৰু ফাঁচী বজাৰ অঞ্চলত।
বিগত কিছুদিন ধৰি অনাই-বনাই ঘুৰি ফুৰা ৰঙা ৰঙৰ কুকুৰটোৱে সোমবাৰে মহানগৰীৰ জনসাধাৰণৰ ওপৰত অধিক আক্ৰমণাত্মক হৈ পৰি প্ৰায় পঞ্চাশজনতকৈও অধিক লোকক চিকিৎসালয়ৰ বাট দেখুৱাই।
প্ৰাপ্ত খবৰ অনুসৰি সোমবাৰে বলিয়া কুকুৰটোৱে লাখটকীয়াৰ ব্যৱসায়িক অঞ্চলত কেইবাগৰাকী লোকক কামুৰি পানবজাৰ আৰু ফাঁচী বজাৰ অঞ্চলটো ত্ৰাসৰ সৃষ্টি কৰে। কুকুৰটোৰ আক্ৰমণত পুৰুষ, মহিলাকে ধৰি আহত হোৱা প্ৰায় পঞ্চাশ জন লোকৰ ভিতৰত বহু সংখ্যক লোকে জলাতংক ৰোগত আক্ৰান্ত হোৱাৰ ভয়ত মহেন্দ্ৰ মোহন চৌধুৰী হস্পাতালত চিকিৎসাধীন হয়।
বলিয়া কুকুৰটোৱে ব্যস্ত অঞ্চলত এনেদৰে জনসাধাৰণক কামুৰি ফুৰা কথাটোৱে বন বিভাগৰ দায়িত্ব আৰু জনসাধাৰণৰ সুৰক্ষাৰ দিশটোৰ ক্ষেত্ৰত তাৎপৰ্য বহন কৰিছে। পান বজাৰৰ দৰে ছাত্ৰ-ছাত্ৰীৰে ভৰি থকা অঞ্চল এটাত বলিয়া কুকুৰৰ উপদ্ৰপত স্থানীয় নাগৰিক সকলে শীঘ্ৰে বলিয়া হোৱাৰ লক্ষণ দেখা কুকুৰ বিলাকৰ ক্ষেত্ৰত কাৰ্যব্যৱস্থা গ্ৰহণ কৰাৰ বাবে বন বিভাগক আহ্বান জনায়।
