ডোনাল্ড ট্ৰাম্পৰ অভিযোগ কৰ’নাৰ ক্ষেত্ৰত WHOই চীনৰ পক্ষ লৈছে

কৰ’না ভাইৰাছে সমগ্ৰ বিশ্বতে ত্ৰাস সৃষ্টি কৰিছে। এতিয়ালৈকে ২০ হাজাৰতকৈয়ো অধিক লোকে জীৱন হেৰুৱাইছে।

ইয়াৰ মাজতে আমেৰিকাৰ ৰাষ্ট্ৰপতি ডোনাল্ড ট্ৰাম্পে বিশ্ব স্বাস্থ্য সংস্থাৰ (WHO) ওপৰত গুৰুতৰ অভিযোগ উত্থাপন কৰিছে।

ট্ৰাম্পে কয় যে কৰ’না ভাইৰাছৰ বিষয়ত WHOই চীনৰ পক্ষ লৈছে আৰু তেওঁলোক বচোৱাৰ চেষ্টা কৰিছে।

হোৱাইট হাউছত অনুষ্ঠিত সংবাদমেলত আমেৰিকাৰ ৰাষ্ট্ৰপতিগৰাকীয়ে কয় যে কৰ’না ভাইৰাছক লৈ প্ৰথমতেও কেইবাবাৰো বিপদ উপস্থিত হৈছিল। কিন্তু WHOই ইয়াক লুকুৱালে।

আমেৰিকাৰ ৰাষ্ট্ৰপতিগৰাকীয়ে কয় যে WHOই সদায় চীনৰ পক্ষ গ্ৰহণ কৰি আহিছে আৰু তেওঁলোকক সুৰক্ষা দিছে। যদি প্ৰথমেই বিশ্বত ইয়াৰ খৱৰ থাকিলহেতেন তেতিয়াহ’লে ইমান প্ৰাণ নগ’লহেতেন।

উল্লেখ্য যে আমেৰিকান কংগ্ৰেছমেন গ্ৰেগে তেওঁৰ এটা টুইটত WHOৰ ওপৰত অভিযোগ তোলাৰ পাছতে এনে প্ৰশ্নৰ অৱতাৰণা হৈছিল। এতিয়া গ্ৰেগৰ অভিযোগৰ সৈতে সুৰ মিলাই ট্ৰাম্পেও একে প্ৰশ্নৰেই অৱতাৰণা কৰিছে।

পূৰ্বেও ট্ৰাম্পে কৰ’না ভাইৰাছৰ ক্ষেত্ৰত চীনক লক্ষ্য কৰি লৈছিল। সেয়াই নহয়, তেওঁ ইয়াক চীনা ভাইৰাছ বুলিও কৈ আহিছে।

ট্ৰাম্পৰ মতে এই ভাইৰাছ চীনৰ পৰা আহিছে, চীনৰ বাবে বিয়পিছে আৰু সেইকাৰণে ইয়াক চীনা ভাইৰাছ বুলিয়ে ক’ব লাগিব।

উল্লেখযোগ্য যে আমেৰিকাত কৰ’না ভাইৰাছৰ সন্ত্ৰাস অব্যাহত আছে।