“ভাৰতত আইফোন নবনাব…” এপলৰ চিইঅ’ টিম কুকলৈ ড’নাল্ড ট্ৰাম্পৰ বিশেষ অনুৰোধ, কিন্তু কিয়?
আমেৰিকাৰ ৰাষ্ট্ৰপতি ড’নাল্ড ট্ৰাম্পে এপলে ভাৰতত উৎপাদন কৰাটো নিবিচাৰে। শেহতীয়াকৈ আমেৰিকাৰ ৰাষ্ট্ৰপতিগৰাকীয়ে ডোহাত এক বাণিজ্যিক অনুষ্ঠানত এপলৰ চিইঅ’ টিম কুকৰ সৈতে হোৱা আলোচনাৰ সময়ত এই কথা স্পষ্ট কৰি দিয়ে।
ট্ৰাম্পে টিম কুকক স্পষ্টভাৱে কয় যে এপলে ভাৰতত মেনুফেকচাৰিং ইউনিট স্থাপন কৰাত তেওঁৰ অনুমোদন নাই। ইয়াৰ ফলত ভাৰতত এপলৰ মেনুফেকচাৰিং ইউনিটৰ ভৱিষ্যতক লৈ প্ৰশ্ন উত্থাপন হৈছে।
ট্ৰাম্পে কুকক কয়, “মই শুনিছো যে আপুনি ভাৰতত সামগ্ৰী বনাইছে। মই নিবিচাৰো যে আপুনি ভাৰতত সামগ্ৰী বনাওক। যদি আপুনি ভাৰতৰ চোৱাচিতা কৰিব বিচাৰে তেন্তে আপুনি সেই দেশত সামগ্ৰী বনাব পাৰে। কিয়নো বিশ্বৰ ভিতৰতে সৰ্বাধিক শুল্ক আৰোপ কৰা দেশসমূহৰ ভিতৰত এখন ভাৰত। সেয়ে সেই দেশত সামগ্ৰী বিক্ৰী কৰাটো অতি কঠিন।”
ট্ৰাম্পে দাবী কৰিছে যে এই বাৰ্তালাপৰ পিছত এপলে আমেৰিকাত উৎপাদন বৃদ্ধিৰ ওপৰত গুৰুত্ব দিব। অৱশ্যে এই মুহূৰ্তত এপলৰ সৰ্ববৃহৎ উৎপাদনকাৰী দেশ চীন। কিন্তু এপল কৰ্তৃপক্ষই উৎপাদনৰ বৃহৎ অংশ চীনৰ পৰা ভাৰতলৈ স্থানান্তৰিত কৰাৰ পৰিকল্পনা কৰিছিল। সেইবাবেই টিম কুকৰ কোম্পানীয়ে যোৱা কেইবছৰমানৰ পৰা ভাৰতত ইটোৰ পিছত সিটো প্ৰডাকচন ইউনিট স্থাপন কৰাত গুৰুত্ব আৰোপ কৰি আহিছে।
২০২৪ চনৰ মাৰ্চ মাহত সমাপ্ত হোৱা বিত্তীয় বৰ্ষত এপলে ভাৰতত ২২ বিলিয়ন ডলাৰৰ আইফোন নিৰ্মাণ কৰিছিল, যিটো যোৱা বছৰৰ তুলনাত প্ৰায় ৬০ শতাংশ অধিক। কিন্তু এইবাৰ ট্ৰাম্পে এই অগ্ৰগতিৰ ওপৰত নিয়ন্ত্ৰণ আনিবলৈ চেষ্টা কৰিছে। যাৰ ফলত ভাৰতত এপলৰ প্ৰডাকচন ইউনিটসমূহত প্ৰভাৱ পৰিব পাৰে ।