বোকাখাতৰ জেডিএছজি মহাবিদ্যালয়ত বীৰাঙ্গণা ডঃ বীৰুবালা ৰাভাৰ সজাগতা সভাত অংশগ্ৰহণ
বোকাখাতৰ জে ডি এছ জি মহাবিদ্যালয় আৰু বোকাখাত আৰক্ষী প্রশাসনৰ সহযোগত আয়োজিত এক বিশেষ সজাগতা সভাত আজি ডাইনী প্ৰথাৰ বিৰুদ্ধে সুদীৰ্ঘ দিন যুঁজ দি অহা ড৹ বীৰুবালা ৰাভাই অংশ গ্রহণ কৰে। ডাইনী হত্যাৰ প্ৰতিবাদত এককভাৱে সংগ্রাম কৰি বীৰাঙ্গণাৰ দৰে উপাধি লাভ কৰা ড৹ বীৰুবালা ৰাভা বোকাকাখাত জেডিএছজি মহাবিদ্যালয়ৰ অসমীয়া আৰু ইংৰাজী বিভাগৰ উদ্যোগত মহাবিদ্যালয়ৰ আভ্যন্তৰীণ মান নিশ্চিতকৰণ কোষ আৰু বোকাখাত আৰক্ষী প্রশাসনৰ সহযোগত আয়োজিত এই সভাত ড৹ বীৰুবালা ৰাভাক বিপুল সম্বৰ্ধনা জনোৱা হয় ।
মহাবিদ্যালয়ৰ ইংৰাজী বিভাগৰ মুৰব্বী অধ্যাপক দীপালি ৰাজখোৱা ফুকনৰ পৌৰহিত্যত আয়োজিত এই সজাগতা সভাত মহাবিদ্যালয়খনৰ অধ্যক্ষ ড৹ জয়ন্ত গগৈ, উপাধ্যক্ষ মানসী ফুকন, বোকাখাতৰ মহকুমা আৰক্ষী বিষয়া বিতুল চেতিয়া, বীৰুবালা মিচনৰ কৰ্মকৰ্তা নাট্যবীৰ দাস, জেষ্ঠ সাংবাদিক ভৱানন্দ কলিতা, বুবুল দত্ত, আৰু সহযোগী অধ্যাপক গোপিকানন্দ শইকীয়া উপস্থিত থাকে৷
অনুষ্ঠানত বীৰুবালা ৰাভাই সজাগতাৰ বাবেই এনে অনুষ্ঠান অনুষ্ঠিত কৰাৰ লগতে নাৰী সমাজ শিক্ষিত নহ’লে কু-সংস্কাৰ, অন্ধবিশ্বাস সমাজৰ পৰা কেতিয়াও দূৰ নহয় বুলি মন্তব্য কৰে। লগতে জেডিএছজি মহাবিদ্যালয়লৈ প্ৰথম বাৰৰ বাবে আহি ভাল লগা বুলিও জানিবলৈ দিয়ে।
মহাবিদ্যালয়ৰ অধ্যক্ষ ডঃ জয়ন্ত গগৈয়ে প্রতিবাদী কণ্ঠ ডঃ বীৰুৱালা ৰাভাক আমন্ত্রণ কৰি আনি তেওঁৰ বক্তব্যৰ পৰা ছাত্র-ছাত্রীসকল উপকৃত হ’ব বুলি মন্তব্য কৰে। তেওঁ ‘মিচন বীৰুবালা’ৰ এটা কোষ মহাবিদ্যালয়ত প্রতিষ্ঠা কৰিব বুলি ঘোষণা কৰে। অনুষ্ঠানটোৰ আঁত ধৰে অসমীয়া বিভাগৰ প্ৰৱক্তা ড৹ ৰুবী বৰাই৷