অসমৰ আগন্তুক পঞ্চায়ত নিৰ্বাচনৰ বাবে প্ৰচাৰ অভিযান ক্ৰমাৎ তীব্ৰতৰ হৈ পৰিছে। শেহতীয়াভাৱে বিজেপি দলৰ হৈ নিৰ্বাচনী প্ৰচাৰ চলোৱাৰ বাবে লখিমপুৰত আহি উপস্থিত হৈছেহি ৰাজ্যখনৰ বিত্ত, গড়কাপ্তানি আৰু স্বাস্থ্য মন্ত্ৰী ড০ হিমন্ত বিশ্ব শৰ্মা। আজি ২৬ নৱেম্বৰৰ আবেলি অসম চৰকাৰৰ এই হাই প্ৰফাইল মন্ত্ৰীজনে লীলাবাৰী, উজ্জলপুৰ, আজাদ আৰু সোমদিৰি গাঁও পঞ্চায়ত এলেকাত জোৰদাৰ নিৰ্বাচনী প্ৰচাৰ অভিযান চলায়।
লীলাবাৰী বিমানবন্দৰৰ ওচৰৰ ড০ ভূপেন হাজৰিকা মঞ্চত নিৰ্বাচনী প্ৰচাৰ সমদলক সম্বোধন কৰি ড০ শৰ্মাই লখিমপুৰৰ বিধায়ক উজ্জল দত্তক চোকা সমালোচনা কৰি কয় যে ২০১৬ৰ নিৰ্বাচনত বিজেপিৰ কৰ্মীসকলৰ সাহাৰ্যত নিৰ্বাচনক জিকি অহা অগপ দলৰ বিধায়ক দত্তই বিজেপিৰ কৰ্মীসকলক প্ৰতাৰণা কৰিছে। ড০ শৰ্মাই অভিযোগ কৰি কয় যে বিধায়ক দত্তই সমষ্টিবাসীৰ বাবে একোৱেই নকৰিলে।
মন্ত্ৰীগৰাকীয়ে আৰু কৈছে যে বিগত ২৫ বছৰে বিধায়ক দত্তই সমষ্টিবাসীৰ বাবে একোৱেই নকৰিলে আৰু লখিমপুৰৰ উন্নয়নৰ বাবে আবণ্টন কৰা পুঁজিৰ হৰণলুকি কৰিছে।
ড০ শৰ্মাই আৰু কৈছে যে উন্নয়ন নোহোৱা বুলি সততে বাতৰিৰ শিৰোনামত থকা তেলাহী গাঁও পঞ্চায়তৰ বাট-পথৰ উন্নয়নৰ বাবে ৪০ কোটি টকা লখিমপুৰৰ বৰ্তমানৰ বিধায়কজনে আত্মসাত কৰিছে।
শৰ্মাই লগতে বৰ্তমানৰ বিজেপি চৰকাৰে ৰাজ্যখনত কৰা উন্নয়নৰ এটা খতিয়ান ডাঙি ধৰে আৰু আগন্তুক নিৰ্বাচনত বিজেপিক ভোট দিয়াৰ বাবে অনুৰোধ কৰে।
মন্ত্ৰীগৰাকীয়ে আজি আজাদ-বাহপতিত আয়োজন কৰা এখন ফুলবল প্ৰতিযোগিতাও উদ্বোধন কৰে আৰু সমৱেত এটা নিৰ্বাচনী সমদলক উদ্দেশ্যি ভাষণ দিয়ে।
