আম,কঁঠাল,বগৰী,কল,কমলা কিমান যে ফল..এনেধৰণৰ প্ৰায় সকলো বিধ ফলেই আমাৰ সকলোৰে চিনাকি।
কিন্তু যিবিধ ফলৰ কথা কবলৈ লোৱা হৈছে সেই ফল বিধ বহুতৰে বাবেই এবিধ অচিনাকি ফল।
অসমতে হোৱা অতি সুস্বাদু এই ফল বিধৰ আদৰ আকৌ বিশ্বজোৰা। সোৱাদ আৰু পুষ্টিগুণৰ দিশৰ পৰা অতি উত্তম ফল হিচাবে পৰিগণিত হোৱা এই ফল বিধ অসমৰ অতি কম সংখ্যক লোকেহে চিনি পায়।
সেই সকলৰ ভিতৰত হয়তো আপুনিও এজন হ’ব পাৰে।
যি কি নহওক,ফল বিধ অসমতে পায় যদিও অসমৰ সকলো ঠাইতে অৱশ্যে ফলবিধ এতিয়াও প্ৰচুৰ পৰিমাণে পোৱা হোৱা নাই।
কাৰণ ফল বিধে অসমত প্ৰৱেশ কৰা বৰ বেছি দিন হোৱা নাই। মূলতঃ লেটিন আমেৰিকাৰ ফল হিচাবে জনাজাত এই ফল বিধ দক্ষিণ-পূব এছিয়া,মধ্য এছিয়াৰ লগতে আফ্ৰিকাৰো বিভিন্ন অঞ্চলত পোৱা যায়।
অসমত নতুনকৈ খেতি আৰম্ভ কৰা এই ফল বিধৰ নাম ড্ৰেগন ফ্ৰুইট।
ড্ৰেগন ফ্ৰুইট ইয়াৰ জনপ্ৰিয় নাম যদিও প্ৰকৃত নাম পিছে পিটাহায়া।
কেকটাছ প্ৰজাতিৰ উদ্ভিদত লগা ফল বিধৰ বৈজ্ঞানিক নাম Hylocereus undatus.
অসমৰ ওদালগুৰিকে ধৰি বিভিন্ন ঠাইত এতিয়া ড্ৰেগন ফ্ৰুইটছৰ খেতি আৰম্ভ হৈছে। ভিটামিন চিৰে সমৃদ্ধ ড্ৰেগন ফ্ৰুইটছত প্ৰচুৰ পৰিমাণে থাকে আইৰণ,ফচফৰাছ,জিংক আদিৰ লগতে শৰীৰৰ বাবে প্ৰয়োজনীয় বহু উপাদান।
খাবলৈ মিঠা ফল বিধৰ বজাৰ মূল্যও সেয়ে বেছি।প্ৰতি কিলোগ্ৰামত ৪০০ টকা।ৰোগ প্ৰতিৰোধ ক্ষমতা বৃদ্ধিৰ লগতে এই ফলে কোষ্ঠকাঠিন্য দূৰ কৰাত সহায় কৰে।কিছুদিনৰ পিছত হয়তো ড্ৰেগন ফ্ৰুইটছেৰে ভৰি পৰিব অসমৰ বজাৰ। ড্ৰেগন ফ্ৰুইটছ এতিয়া বাণিজ্যিক ভিত্তিত বহুতেই কৰিবলৈ লৈছে।ফল বিধৰ বাণিজ্যিক সম্ভাৱনা বহু বেছি বাবেই বহুতে এই ফলৰ খেতিৰ প্ৰতি আগ্ৰহী হোৱা দেখা গৈছে।
