আজি পুৱতি নিশা প্ৰায় ১:৩০ বজাত মাৰ্ঘেৰিটাত এক ভয়ংকৰ সংঘৰ্ষৰ সৃষ্টি হয় অসম আৰক্ষী আৰু আলফা (স্বাধীন) ৰ মাজত। তিনিচুকীয়া জিলাৰ মাৰ্ঘেৰিটা থানাৰ অন্তৰ্গত মালুগাঁৱত সংঘটিত হয় এই সংঘৰ্ষ।
এই সংঘৰ্ষত আৰক্ষীৰ গুলীত নিহত হৈছে আলফা (স্বাধীন) ৰ দুৰ্ধৰ্ষ কামাণ্ডাৰ উদয় অসম। উদয় অসম আলফা (স্বাধীন)ৰ এগৰাকী অন্যতম গুৰুত্বপূৰ্ণ ফিল্ড কামাণ্ডাৰ আছিল বুলি জানিব পৰা গৈছে।
তিনিচুকীয়া জিলাৰ আৰক্ষী অধীক্ষক গৌৰৱ অভিজিৎ দিলিপে এই সংঘৰ্ষৰ কথা নিশ্চিত কৰি কয়, “নিষিদ্ধ ঘোষিত আলফা (স্বাধীন)ৰ সদস্য উত্তম লাহন ওৰফে উদয় অসম তিনিচুকীয়া জিলাত নিৰাপত্তাৰক্ষীৰ সৈতে হোৱা গুলীয়াগুলীত নিহত হয়।”
প্ৰকাশিত খবৰ অনুসৰি ৰাজ্যৰ নৱনিযুক্ত আৰক্ষী সঞ্চালক প্ৰধান জি পি সিঙৰ প্ৰত্যক্ষ তত্বাৱধানত এই অভিযান চলোৱা হয়। সিঙে গুৱাহাটীৰ পৰা এই অভিযানৰ তত্বাৱধান কৰিছিল।
জানিব পৰা মতে, আলফা (স্বাধীন)ৰ আন ৭-৮ গৰাকী কেডাৰৰ সৈতে উদয় অসমে বিগত ১০ দিন মাৰ্ঘেৰিটাৰ এটা অঞ্চলত শিবিৰ পাতি আছিল।
উদয় অসমৰ নেতৃত্বত নিষিদ্ধ ঘোষিত সংগঠনটোৱে তিনিচুকীয়া জিলাৰ এগৰাকী ব্যৱসায়ীক অপহৰণ কৰাৰ পৰিকল্পনা কৰিছিল বুলি জানিব পৰা গৈছে। উগ্ৰপন্থী দলটোৰ বিষয়ে তথ্য লাভ কৰাৰ লগে লগে অসম আৰক্ষীয়ে অভিযান আৰম্ভ কৰে।
এই অভিযানত উদয় অসমৰ মৃত্যু হ’লেও দলটোত থকা আনকেইগৰাকী সদস্য আন্ধাৰৰ সুযোগ লৈ অঞ্চলটোৰ পৰা পলায়ন কৰিবলৈ সক্ষম হয় বুলি আৰক্ষীৰ ভাষ্যত প্ৰকাশ পাইছে।
সংঘৰ্ষস্থলীৰ পৰা আৰক্ষীয়ে এটা সৰু ফায়াৰ আৰ্ম, এটা ৰাইফল, দুটা গ্ৰেনেড, আই ই ডি মেটেৰিয়েল, কম্বলসহ এটা বেগ আৰু কিছু ঔষধ উদ্ধাৰ কৰিছে।
ইফালে, নিৰাপত্তা বাহিনীয়ে সমগ্ৰ অঞ্চলটো ঘেৰাও কৰি পলাতক আনকেইগৰাকী কেডাৰক আটক কৰিবলৈ ব্যাপক অভিযান আৰম্ভ কৰিছে বুলি জানিব পৰা গৈছে।
