মদ খাই কেৱল যে মানুহেই মাতাল হয় তেনে নহয়। এইবাৰ মদ খাই মাতাল হ’ল তিনিটাকৈ ম’হ।
ঘটনাটো সংঘটিত হৈছে গুজৰাটৰ গান্ধীনগৰৰ চিলোদা নামৰ গাঁও খনত।
গাঁও খনৰ তিনিটাকৈ ম’হে এটা খালৰ পানী খোৱাৰ পিছৰে পৰা অস্বাভাৱিক আচৰণ কৰিবলৈ লয়।
মহকেইটা ৰখা স্থানৰ কাষতে আছিল খালটো। পানী খোৱাৰ পিছৰে পৰা ম’হ কেইটাৰ আচৰণ সলনি হৈ পৰে আৰু অদ্ভুত ধৰণে জঁপিয়াবলৈ আৰম্ভ কৰে। ম’হ কেইটাৰ মুখেৰে ফেন ওলাবলৈ ধৰে।
এই ঘটনা প্ৰত্যক্ষ কৰি ম’হ কেইটাৰ গৰাকী দীনেশ ঠাকুৰে এজন পশু চিকিৎসকক মতাই আনি ম’হ কেইটাৰ চিকিৎসা কৰোৱায় যদিও কোনো কাম নিদিলে।
পিচদিনাও ম’হ কেইটাই একে আচৰণেই কৰি থকাত ম’হৰ গৰাকী দীনেশ ঠাকুৰ আন এজন পশু চিকিৎসকক মতাই আনে।
পশু চিকিৎসকজনে ম’হ কেইটা ৰখা ঠাই ডোখৰ চাই-চিতি মদৰ গোন্ধ পায়।
এই বিষয়ে ম’হ কেইটাৰ গৰাকী দীনেশ ঠাকুৰক প্ৰশ্ন কৰাত তেওঁ এই বিষয়ত অজ্ঞতা প্ৰকাশ কৰে। দৰাচলতে ম’হ কেইটাই যিটো খালত পানী খাইছিল সেই খালটোৰ কাষতে লুকুৱাই ৰখা হৈছিল শতাধিক বিলাতী সুৰাৰ বটল।
সেই বটলৰ মাজৰে কেইটামান ভাগি গৈ পানীৰ সৈতে মদ মিহলি হৈ গৈছিল। সেই পানী খোৱাৰ পিছতে ম’হ কেইটাই অদ্ভুত আচৰণ কৰিবলৈ ধৰিছিল।
এই ঘটনাৰ বিষয়ে অৱগত হোৱাৰ পিছতে চিকিৎসকজনে স্থানীয় আৰক্ষীক খবৰ দিয়ে।
আৰক্ষীয়ে ঘটনাস্থলীত উপস্থিত হৈ খালৰ কাষত মদ লুকুৱাই ৰখা দীনেশ ঠাকুৰৰ লগতে তেওঁৰ ভাতৃ অম্বাৰাম আৰু ৰবি ঠাকুৰক আটক কৰে।
আৰক্ষীয়ে সেই স্থানৰ পৰা ১০১ টা হুইস্কি, ভদকা আদিৰ বটল জব্দ কৰে।
উল্লেখ্য গুজৰাটত মদ মজুত কৰি ৰখাটো এক গুৰুতৰ ্পৰাধ হিচাবে গণ্য কৰা হয়।
