শিৱসাগৰ জিলাত শুকুৰবাৰে ক’ভিড-১৯ প্ৰতিষেধক প্ৰদানৰ ‘ড্ৰাই ৰান’ কাৰ্যসূচীৰ সফল সামৰণি পৰে।
এই ড্ৰাই ৰান অনুশীলন জিলাখনৰ চাৰিটাকৈ স্বাস্থ্য সেৱা প্ৰতিষ্ঠান, ক্ৰমে- শিৱসাগৰ অসামৰিক চিকিৎসালয়, উড নগৰীয়া স্বাস্থ্য কেন্দ্ৰ, স্বৰ্গদেউ চুকাফা মাল্টি-স্পেচিয়েলিটি চিকিৎসালয় আৰু খেলুৱা খণ্ড প্ৰাথমিক স্বাস্থ্য কেন্দ্ৰত পুৱা ৯ বজাৰ পৰা দিনৰ ১১ বজালৈ সম্পন্ন কৰা হয়।
প্ৰতিখন স্বাস্থ্য সেৱা প্ৰতিষ্ঠানত ২৫ গৰাকীকৈ মুঠ ১০০ গৰাকী হিতাধিকাৰীক এই অনুশীলনত সাঙুৰি লোৱা হয়। এই হিতাধিকাৰীসকল মূলতঃ স্বাস্থ্য সেৱাৰ লগত জড়িত লোক যেনে চিকিৎসক, নাৰ্চ, লেব টেকনিচিয়ান, আশাকৰ্মী, আংগনবাড়ী কৰ্মীক আগতীয়াকৈ নিৰ্বাচিত কৰা হৈছিল আৰু তেওঁলোকে এই অনুশীলনত হিতাধিকাৰী হিচাপে অংশগ্ৰহণ কৰে৷
এই অনুশীলনৰ অংশস্বৰূপে ক’ভিড ভেকচিন পৰিবহণ, ভেকচিন প্ৰদান কৰাৰ পাছত CoWIN পৰ্টেলত তথ্য আপলোড কৰা লৈকে কৰিবলগীয়া সম্পূৰ্ণ প্ৰক্ৰিয়াৰ পূৰ্ণকালীন অনুশীলন সম্পন্ন কৰা হয় ৷ একেদৰে, স্বাস্থ্য কেন্দ্ৰত হিতাধিকাৰী সকলে মানি চলিবলগীয়া ক’ভিড প্ৰটকল যেনে হাত ধোৱা, মাস্ক পৰিধান কৰা আৰু সামাজিক দূৰত্ব বজাই ৰখাৰ বাবে ল’বলগীয়া ব্যৱস্থা উপলব্ধ কৰোৱা হয়৷
শিৱসাগৰ জিলাৰ উপায়ুক্ত বিষ্ণু কমল বৰাই স্থানীয় উড নগৰীয়া স্বাস্থ্য কেন্দ্ৰত চলি থকা অনুশীলনৰ সময়ত উপস্থিত হৈ সমগ্ৰ প্ৰক্ৰিয়াৰ বুজ লয়৷ উপায়ুক্ত গৰাকীৰ লগত স্বাস্থ্য বিভাগৰ দায়িত্বত থকা অতিৰিক্ত উপায়ুক্ত চন্দনা বৰুৱাও উপস্থিত থাকে।
জিলা উপায়ুক্ত গৰাকীয়ে অনুশীলনৰ অন্তত স্বাস্থ্য বিভাগৰ বিষয়ববীয়াৰ সৈতে উপায়ুক্ত কাৰ্য্যালয়ৰ সভাকক্ষত জিলা টাস্ক ফৰ্চৰ এখন বৈঠকতো মিলিত হয় আৰু সমগ্ৰ জিলাত সম্পন্ন হোৱা অনুশীলনৰ লগতে স্বাস্থ্য বিভাগৰ বিভিন্ন কাম-কাজৰ বিষয়ে বিস্তৃত ভাৱে বুজ লয়৷
