কংগ্ৰেছ এৰিব দুলু আহমেদে; বিজেপিত যোগদানৰ পূৰ্ণ সম্ভাৱনা
ছ’চিয়েল মিডিয়া যোগে আগন্তুক ২০ আগষ্টৰ ভিতৰত কংগ্ৰেছ দল ত্যাগ কৰাৰ কথা ঘোষণা কৰিছে কংগ্ৰেছ যুৱ নেতা দুলু আহমেদে।
কংগ্ৰেছৰ সাধাৰণ সম্পাদকৰ দায়িত্বত আছিল দুলু আহমেদ।
এক ফেইচবুক পোষ্টযোগে আহমেদে কয় “কিছু শীৰ্ষ নেতাৰ কৰ্মক লৈ মই সন্তুষ্ট নহয়। সেই গতিকে অহা ২০ আগষ্ট তাৰিখে মই পূৰ্বে ঘোষণা কৰা দলীয় কাৰ্য্যসূচীৰ পিছত দল ত্যাগ কৰিম।”
তেওঁৰ এই ঘোষণাৰ পাছতে পুনৰবাৰ স্পষ্ট হৈ পৰিছে কংগ্ৰেছৰ নেতৃত্ব কেন্দ্ৰিক সংঘাত।
মঙলবাৰে নিশা অন্য এক ফেইচবুক পোষ্ট যোগে তেওঁ বিৰোধী দলপতিক সমালোচনা কৰিছিল।
ইয়াৰোপৰি, চামগুৰি সমষ্টিৰ বিধায়ক তথা প্ৰাক্তন কংগ্ৰেছী ৰকিবুল হুছেইনৰ লগত দুলু আহমেদৰ সংঘাত দীৰ্ঘদিনীয়া।
দলীয় নেতৃত্বৰ বিৰুদ্ধে ক্ষোভ উজৰাত তেওঁক পূৰ্বেও কংগ্ৰেছৰ পৰা কেইদিনমানৰ বাবে নিলম্বন কৰা হৈছিল।
আনহাতে, এক সূত্ৰৰ পৰা জানিব পৰা মতে আহমেদে অতি শীঘ্ৰেই বিজেপিত যোগদান কৰি গেৰুৱা বসন পিন্ধিব।
কিন্তু দুলু আহমেদে নিজ মুখে এই কথা স্বীকাৰ কৰা নাই।