‘বিটিএডিত অবৈধ অস্ত্ৰৰ ৰমৰমীয়া সাম্ৰাজ্য গঢ়ি তুলিছে বিটিচি প্ৰধান হাগ্ৰামা মহিলাৰী আৰু কোকৰাঝাৰ লোকসভা সমষ্টিৰ সাংসদ নৱ শৰণীয়াই।’ এই মন্তব্য কংগ্ৰেছৰ সমন্বয়ক দুৰ্গাদাস বড়োৰ।
বাক্সা জিলাৰ কদমতলত কংগ্ৰেছৰ সমন্বয়ক দুৰ্গাদাস বড়োৱে আজি এক অনুষ্ঠানত অংশ ল’বলৈ গৈ সাংবাদিকৰ আগত এই গুৰুত্বপূৰ্ণ মন্তব্য কৰে।
কংগ্ৰেছৰ নেতাগৰাকীয়ে আৰু কয় যে বিটিএডিত দিনে দিনে বৃদ্ধি পোৱা হত্যা-হিংসা, লুটপাত আদিৰ মূলতে হৈছে ব্যাপক হাৰত বৃদ্ধি পোৱা অবৈধ অস্ত্ৰ। অঞ্চলটোত বৃদ্ধি পোৱা অবৈধ অস্ত্ৰসমূহ অতি শীঘ্ৰে জব্দ কৰাৰ বাবে সংবাদ মাধ্যমৰ জৰিয়তে তেওঁ ৰাজ্যপালক আহ্বান জনায়।
আনহাতে ২০১৯ৰ লোকসভা নিৰ্বাচনত বিজেপিয়ে মূল্য বৃদ্ধিৰ কুফল ভোগ কৰিব লাগিব বুলিও মন্তব্য কৰে। তাৰোপৰি মঙলদৈৰ দুনীত এক অনুষ্ঠানত পতঞ্জলিৰ যোগ নিৰীক্ষক সতীনাথ বাৰালে শংকৰদেৱৰ বিৰুদ্ধে কৰা মন্তব্যই অসমৰ স্বাভিমানত আঘাত হানিছে বুলি উল্লেখ কৰি শীঘ্ৰে বাৰালক গ্ৰেপ্তাৰৰ দাবী তোলে দুৰ্গাদাস বড়োৱে।
