অসমৰ বৌদ্ধিক আৰু যুক্তিবাদী আন্দোলনৰ এক অগ্ৰণী কাণ্ডাৰী বিশিষ্ট সমাজ বিজ্ঞানী তথা নৃগোষ্ঠীবিদ ইন্দিবৰ দেউৰীৰ আজি মৃত্যু হয়। দীৰ্ঘদিন ধৰি শাৰীৰিক অসুস্থতাৰ সৈতে যুঁজি থকা বিশিষ্ট চিন্তাবিদগৰাকীয়ে আজি পুৱা গুৱাহাটী চিকিৎসা মহাবিদ্যালয়ত শেষ নিশ্বাস ত্যাগ কৰে।
প্ৰথিতযশা বুদ্ধিজীৱী, চিন্তাবিদ, বিশিষ্ট গৱেষক, নিবন্ধকাৰ গৰাকীৰ মৃত্যুত গভীৰ শোক প্ৰকাশ কৰিছে ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে।
এক বিবৃতি যোগে ডি ৱাই এফ আইৰ অসম ৰাজ্যিক কমিটিয়ে ইন্দিবৰ দেউৰীলৈ শেষ শ্ৰদ্ধা জনাই শোক সন্তপ্ত পৰিয়াল তথা গুণমুগ্ধ সকললৈ সমবেদনা জ্ঞাপন কৰে।
ডি ৱাই এফ আই- এ বিবৃতিটোত কয়, “ভাৰতীয় ডাক বিভাগৰ অৱসৰপ্ৰাপ্ত মহাপ্ৰৱন্ধক, ইন্দিবৰ দেউৰীৰ মৃত্যু ৰাজ্যখনৰ বাবে ডাঙৰ ক্ষতি। তেখেতে বিভিন্ন গৱেষণাধৰ্মী লিখনি, কাকত-আলোচনীত প্ৰকাশিত প্ৰবন্ধসমূহৰ মাজেৰে ৰাজ্যবাসীলৈ অশেষ বৌদ্ধিক অৱদান আগবঢ়াই গৈছে।”
অসমৰ অন্যান্য সমস্যা আৰু বিষয়ৰ লগতে জনজাতি আৰু জনজাতীয় সমস্যা সম্পৰ্কত ইন্দিবৰ দেউৰীৰ অধ্যয়ন অতি গভীৰ আৰু চিন্তা উদ্ৰেককাৰী আছিল বুলি সোঁৱৰে ডি ৱাই এফ আই- এ।
বিবৃতিটোত লগতে কোৱা হৈছে, “জনগোষ্ঠীয় সমস্যাঃ অতীত বৰ্তমান আৰু ভৱিষ্যত- নামৰ গ্ৰন্থখন তেখেতৰ গভীৰ গৱেষণাৰ ফল আৰু ৰাজ্যখনৰ বাবে অমূল্য সম্পদ। অন্যান্য সৃষ্টিৰ ভিতৰত আছে “যুক্তিৰ পোহৰত সমাজ”, “যুক্তি আৰু সমাজ” , “যুক্তি বিকাশ” আদি।”
“এই জনা চিন্তাবিদ তথা সমাজ বিজ্ঞানীৰ মৃত্যু ৰাজ্যবাসীৰ বাবে এক অপূৰণীয় ক্ষতি” বুলি ডি ৱাই এফ আই- এ লগতে উল্লেখ কৰে।
