আজি উচ্ছেদৰ নামত গোৱালপাৰা জিলাৰ পাইকানত এগৰাকী ২০ বছৰীয়া যুৱকক পুলিচে গুলীয়াই হত্যা কৰা ঘটনাক ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে কঠোৰ ভাষাৰে নিন্দা কৰিছে আৰু এয়া বৰ্বৰতা আৰু স্বৈৰাচাৰী শাসনৰ চূড়ান্ত নিদৰ্শন বুলি অভিহিত কৰিছে।
পুলিচৰ গুলিত নিহত হোৱা যুৱকৰ পৰিয়ালক আৰ্থিক ক্ষতিপূৰণৰ লগতে আহতসকলক উপযুক্ত চিকিৎসা আৰু সাহায্য প্ৰদান কৰিবলৈ ডি ৱাই এফ আইয়ে দাবী কৰিছে।
উচ্ছেদিত পাইকান অঞ্চলত আৰক্ষী বাহিনীয়ে পুলিচৰাজৰ নিদৰ্শন দেখুৱাই এজন যুৱকক হত্যা কৰাৰ উপৰি বহুকেইজনক গুৰুতৰভাৱে আহত কৰিছে। চৰকাৰৰ নিৰ্দেশত আৰক্ষী বাহিনী ইমানেই নিষ্ঠুৰতা দেখুৱাইছে যে মানুহৰ ঘৰৰ ভিতৰলৈ গৈ নিৰীহ মানুহক প্ৰহাৰ কৰিছে। এয়া মুখ্যমন্ত্ৰী হিমন্ত বিশ্ব শৰ্মা চৰকাৰৰ নিৰ্দেশত চলা আৰক্ষী বাহিনীৰ নিষ্ঠুৰ কাণ্ড।
কেৱল ক্ষমতা দখলৰ নামত মুখ্যমন্ত্ৰীজনে গণতন্ত্ৰ আৰু আইনৰ শাসনক ভৰিৰে মোহাৰি পেলাব ওলাইছে। ক্ষমতাত থকাৰ সুযোগলৈ এনেদৰে আইনৰ শাসনক বৃদ্ধাংগুষ্ঠ দেখুৱা কোনোমতেই উচিত নহয়।
গোৱালপাৰাৰ বিস্তৃত অঞ্চলৰ লগতে পাইকানত দীৰ্ঘদিনে বসবাস কৰি থকা হাজাৰ হাজাৰ লোকk কোনো বিকল্প ব্যৱস্থা নকৰাকৈ উচ্ছেদ কৰিছে। চৰকাৰে প্ৰতি পদে ভয়ংকৰ মানৱ অধিকাৰ লংঘনত লিপ্ত হৈছে। ডি ৱাই এফ আইয়ে মুখ্যমন্ত্ৰীৰ নেতৃত্বত চলা স্বৈৰাচাৰী শাসন শীঘ্ৰে বন্ধ কৰিবলৈ দাবী জনাইছে।
